ცენტრალურმა საარჩევნო კომისიის ინფორმაციით გადათვლილი 360 საარჩევნო უბნიდან "მცირედით არის შეცვლილი" 121 უბნის მონაცემები. ცესკოში აცხადებენ, რომ გადათვლის შედეგად შეცვლილ მონაცემებს არჩევნების შედეგზე გავლენა არ მოუხდენია.

"იყო ხარვეზებიც, რომელიც გადათვლის შედეგად გამოვლინდა და, რა თქმა უნდა, შესაბამისი ცვლილება განხორციელდა მონაცემებში. ცალკეულ კანდიდატებს მცირედით მოემატათ ან დააკლდათ ხმათა რაოდენობა, თუმცა ამას საერთო შედეგზე გავლენა არ მოუხდენია", — აცხადებენ ცესკოში.

ახალი საარჩევნო კოდექსის შესაბამისად, უბნების გადათვლის ვალდებულება ცესკოს წელს პირველად ჰქონდა. არჩევნებიდან მესამე დღეს, 4 ოქტომბერს გადაითვალეს 72 საარჩევნო ოლქის 5-5 უბანი, რომლებიც შემთხვევითი შერჩევით, წილისყრით გამოავლინეს. არ გადაითვალეს მხოლოდ ერთი, კრწანისის ოლქის უბნები, სადაც, ასევე პირველად, კენჭისყრა ელექტრონული ტექნოლოგიის გამოყენებით ჩატარდა.

"საარჩევნო რეფორმის საფუძველზე განხორციელებულმა გადათვლის პროცედურებმა გვაჩვენა, თუ როგორ შეუწყო აღნიშნულმა ხელი პროცესის გამჭვირვალობას, ასევე ცხადყო, რომ საუბნო საარჩევნო კომისიებს ეფექტიანი მუშაობისთვის დამატებითი მოტივაცია მისცა", — აცხადებენ ცესკოში.

ცესკოს ინფორმაციით, გადათვლის პროცესს ესწრებოდნენ დამკვირვებლები, საარჩევნო სუბიექტებისა და მედიის წარმომადგენლები.

გადათვლის შედეგად დამუშავებული მონაცემები შეგიძლიათ იხილოთ ცესკოს ვებგევრდზე.