სულ რამდენიმე დღის წინ დავიწუწუნეთ, რომ ადელი ახალი ალბომის გამოშვებას უსაშველოდ აჭიანურებდა და აი, როგორც ჩანს, განგებამ შეისმინა ჩვენი ვედრებაც.

თითქმის ექვსწლიანი პაუზის შემდეგ ადელი ბრუნდება!

თანამედროვეობის ამ ერთ-ერთმა ყველაზე ცნობილმა ბრიტანელმა მომღერალმა 5 ოქტომბერს ახალი ვიდეოკლიპიდან 21-წამიანი მონაკვეთი გაავრცელა, რითიც ერთდროულად დააანონსა ახალი სიმღერა Easy on Me და რიგით მეოთხე ალბომი.

ამ ვიდეომ YouTube-ზე 24 საათზე ნაკლებ დროში ოთხ მილიონზე მეტი ნახვა დააგროვა:

ფანების ნაწილი ელის, რომ შესაძლოა, ადელის ახალი ალბომი მისი წინა ნამუშევრებისგან განსხვავებული იყოს, თუმცა ერთ სიმღერაზე გადაღებული კლიპის რამდენიმეწამიანი ნაწყვეტით თუ ვიმსჯელებთ, კვლავ კარგად ნაცნობ ადელს ვიხილავთ: შავ-თეთრი ფერები და პიანინოს აკომპანემენტი ადელის სავიზიტო ბარათივითაა.

ადელის ახალი ალბომის სახელწოდება 30 იქნება. აქვე შეგახსენებთ, რომ წინა ალბომებს 19, 21 და 25 ერქვა. სწორედ ოცდაათი წლის ასაკში გაშორდა ადელი (ამჟამად 33 წლისაა) თავის ქმარს, საიმონ კონეცკს და დიდი ალბათობით, ახალი ალბომის თემაც მომღერლის ეს პირადი გამოცდილება იქნება.

ბოლო კვირების განმავლობაში მრავალი სპეკულაციის გამო ფანები ვარაუდობდნენ, რომ ადელი ახალ ალბომს მალე გამოუშვებდა: სხვადასხვა ადგილზე მისტიკური ბილბორდები გამოჩნდა ლაკონიური წარწერით — "30".

და, აი, მალევე მათი ვარაუდებიც გამართლდა.

ახალი სიმღერა, სახელწოდებით Easy on Me, როგორც დაანონსდა, 15 ოქტომბერს გამოვა, მალევე კი ალბომის სრულად მოსმენის შესაძლებლობაც მოგვეცემა.