კანიე ვესტმა Wall Street Journal-ში ბოდიშის წერილი გამოაქვეყნა, სათაურით "მათ, ვისაც ტკივილი მივაყენე".

წერილში რეპერი ნაცისტობასა და ანტისემიტობას უარყოფს და ამბობს, რომ ებრაელი ხალხი უყვარს. ამასთან ერთად მომღერალი წარსულ ქმედებებს, მათ შორის შეურაცხმყოფელ განცხადებებსა და სვასტიკის გამოსახულებიანი მაისურების გაყიდვას, ბიპოლარულ აშლილობას მიაწერს.

ვესტი, რომელიც ამჟამად Ye-ს სახელით არის ცნობილი, ამბობს, რომ აშლილობის გამო რეალობასთან კავშირი დაკარგა და ამ მდგომარეობამ უბიძგა გამოეყენებინა სვასტიკა — სიმბოლო, რომელიც მომღერლის თქმით, მისთვის ყველაზე დამანგრეველ ძალასთან ასოცირდებოდა.

კანიემ ებრაელ თემს 2023 წელსაც მოუბოდიშა, თუმცა 2025 წლის თებერვალში მან სვასტიკის გამოსახულებიანი მაისურების გაყიდვა დაიწყო, რის გამოც პლატფორმა Shopify-მ მისი ვებგვერდი დახურა. მაისში ვესტმა ახალი სიმღერა, სახელად Heil Hitler გამოუშვა, რომელიც ჰიტლერის სიტყვით გამოსვლის ჩანაწერს შეიცავდა და ნაცისტ ლიდერს აქებდა. სიმღერა გერმანიაში სიძულვილის ენისა და ექსტრემიზმის კანონების დარღვევისთვის აიკრძალა, თუმცა ინტერნეტში სწრაფად გავრცელდა. გასულ კვირას მემარჯვენე ინფლუენსერების, მათ შორის ენდრიუ ტეიტისა და ნიკ ფუენტესის ვიდეოები გავრცელდა, რომლებშიც ჩანს, მაიამის ღამის კლუბში როგორ ასრულებენ ნაცისტურ მისალმებას კანიეს სიმღერის ფონზე. ამასთან ერთად, კანიემ წარსულში ჰოლოკოსტიც კი უარყო.

"პირველი ტიპის ბიპოლარული აშლილობის (ბიპოლარული I აშლილობა) ერთ-ერთი ყველაზე რთული ასპექტი რეალობასთან წყვეტის ის მომენტებია, რომლებმაც მცდარი გადაწყვეტილებებისა და გაუწონასწორებელი ქმედებებისკენ მიბიძგა. ძალიან ვნანობ იმ ყველაფერს, რაც ამ მდგომარეობაში ჩავიდინე. მზად ვარ პასუხისმგებლობის აღებისთვის, მკურნალობისა და ცვლილებებისთვის, თუმცა ეს ყოველივე ჩემს საქციელს მაინც არ ამართლებს", — წერს რეპერი.

ვესტმა საკუთარი მდგომარეობა 2002 წელს მომხდარი ავტოკატასტროფით ახსნა: "იმ დროს მთელი ყურადღება ხილულ დაზიანებებზე — მოტეხილობაზე, შეშუპებასა და მყისიერ ფიზიკურ ტრავმაზე იყო მიმართული, უფრო ღრმა დაზიანება კი, რომელიც ჩემს თავის ქალაში იმალებოდა, შეუმჩნეველი დარჩა".

მომღერლის თქმით, ტვინის დაზიანების სათანადო დიაგნოსტირება მხოლოდ 2023 წელს მოხდა: "ამ სამედიცინო შეცდომამ ჩემს ფსიქიკურ ჯანმრთელობას სერიოზული ზიანი მიაყენა და ბიპოლარული I აშლილობა გამოიწვია". აღნიშნული დიაგნოზი რეპერს 2016 წელს დაუსვეს.

ვესტი წერს, რომ 2025 წლის დასაწყისში მან ოთხთვიანი მანიაკალური ეპიზოდი გადაიტანა, რომელსაც თან ახლდა "ფსიქოზური, პარანოიდული და იმპულსური ქცევები, რომლებმაც ჩემი ცხოვრება დაანგრია". მისივე თქმით, ამ მდგომარეობამ მას სუიციდური ფიქრებისკენ უბიძგა. რეპერი აღნიშნავს, რომ როცა მდგომარეობა გაურთულდა, პროფესიონალური დახმარების მიღება მეუღლემ, ბიანკა ცენსორიმ, ურჩია.

"ბიპოლარულ აშლილობას საკუთარი დაცვის სისტემა აქვს — უარყოფა. მანიაკალური ეპიზოდის დროს არ გჯერა, რომ ავად ხარ, გგონია, რომ ყველა დანარჩენი რეაგირებს გადამეტებულად" — წერს ის.

კანიემ აღიარა, რომ მის საყვარელ ადამიანებს, სავარაუდოდ, ყოფილ მეუღლეს, კიმ კარდაშიანსა და უფროს ქალიშვილს, ნორთ ვესტს ყველაზე ცუდად ეპყრობოდა. წერილში აღნიშნავს, რომ მათ მოუწიათ "შიშის, დაბნეულობის, დამცირებისა და დაღლილობის ატანა, რასაც იმ ადამიანის გვერდით ყოფნა იწვევს, რომელიც ზოგჯერ სრულიად ამოუცნობი ხდებოდა".

ვესტმა შავკანიან თემსაც მოუბოდიშა. გასულ წლებში რეპერმა განაცხადა, რომ შავკანიანების მონობა არჩევანი იყო, ის ასევე ატარებდა მაისურს წარწერით "თეთრკანიანთა სიცოცხლე მნიშვნელოვანია" და იყენებდა კონფედერაციის დროშის სიმბოლიკას.

"შავკანიანი საზოგადოება უდავოდ ჩემი იდენტობის საფუძველია. ძალიან ვწუხვარ, რომ იმედები გაგიცრუეთ. მე თქვენ მიყვარხართ", — წერს მუსიკოსი.

კანიემ შვება ონლაინ ვებგვერდებზე იპოვა, სადაც მანიაკალურ და დეპრესიულ ეპიზოდებზე სხვა ადამიანების გამოცდილების შესახებ კითხულობდა: "მათი ისტორიები წავიკითხე და მივხვდი, რომ მარტო არ ვარ. მხოლოდ მე არ ვინადგურებ ცხოვრებას ყოველ წელს, იმის მიუხედავად, რომ ყოველდღიურად მედიკამენტებს ვიღებ. მხოლოდ მე არ მეუბნებიან "მსოფლიოს საუკეთესო ექიმები" რომ არა ბიპოლარული აშლილობა, არამედ აუტიზმის სიმპტომები მაქვს".

მომღერალმა განაცხადა, რომ წამლები, თერაპია, ვარჯიში და ჯანსაღი ცხოვრების წესი სიცხადის დაბრუნებაში დაეხმარა და მისცა მოტივაცია, რომ პოზიტიური და ღირებული ხელოვნება შექმნას.

ვესტის ახალი ალბომის, Bully-ის გამოსვლა რამდენჯერმე გადაიდო, თუმცა სავარაუდოდ ახლო მომავალში მოვისმენთ.

"მე არ ვითხოვ თანაგრძნობას ან პასუხისმგებლობისგან გათავისუფლებას, თუმცა ყველანაირად ვეცდები, თქვენი პატიება დავიმსახურო. ამას მხოლოდ იმისთვის ვწერ, რომ მოთმინება და გაგება გთხოვოთ, სანამ სახლისკენ მიმავალ გზას ვეძებ", — განაცხადა მომღერალმა.