თუ ამ სტატიას კითხულობთ, დიდი ალბათობით, ბოლო პერიოდში თქვენც მოგაკლდათ თვალში ჰერმიონ გრეინჯერის როლის შემსრულებლისგან სიახლეები: ემა უოტსონი ძალიან იშვიათად ჩნდება ახალ ფილმებში, სოციალურ ქსელებსა და პაპარაცების ობიექტივშიც კი.

ამიტომ, შეიძლება იმაზე ნერვიულობაც კი დაიწყეთ უკვე, მილიონობით მაყურებლის ამ საყვარელმა მსახიობმა კარიერა ხომ არ მიატოვა...

ერთადერთი არ ხართ, ვისაც მსგავსი ეჭვები აქვს და ვეცდებით, ამ სტატიაში თქვენს ყველა კითხვას გავცეთ პასუხი.

ამ წლის თებერვალში ბრიტანულმა ტაბლოიდმა Daily Mail გამოაქვეყნა სტატია, რომლის თანახმადაც, ემა უოტსონმა მსახიობობა მიატოვა.

აღნიშნული ინფორმაცია, თითქოს, მსახიობის პირადმა აგენტმა გაავრცელა, რომლის მიხედვითაც, ემას აღარ სურდა საყოველთაო ყურადღების ცენტრში ყოფნა და მეტ დროს უფრო "სავარაუდო საქმროსთან", ლეო რობინტონთან ატარებდა.

Daily Mail-მა ისიც დაწერა, რომ უოტსონის პირადი აგენტის თქმით, მსახიობის კარიერა "არააქტიურია და ის ახალ შეთავაზებებს არ თანხმდება".

რა თქმა უნდა, ამ ჭორებმა უამრავი გულშემატკივარი გაანაწყენა.

თუმცა მოგვიანებით ემა უოტსონის პირადმა მენეჯერმა უარყო ეს ინფორმაცია და განაცხადა: "მისი სოციალური მედიის ანგარიშები არააქტიურია, მაგრამ არა — მისი კარიერა".

თავად ჰარი პოტერის ფილმების სერიის ვარსკვლავი რაღაც დროის განმავლობაში მართლაც ჩუმად იყო და პირადად დიდი ხნის განმავლობაში არ გაუცია პასუხი ზემოთ აღნიშნულ ჭორებზე. მეტიც — ის თითქმის საერთოდ აღარ აქტიურობდა სოციალურ ქსელებში და 2019 წლის ფილმში Little Women (პატარა ქალები) მონაწილეობის შემდეგ ახალი როლი არ მიუღია.

საბოლოოდ, ტვიტერის პირად ანგარიშზე 18 მაისს ყველა ჭორს ერთად გასცა პასუხი:

"ჭორები იმის შესახებ, დავინიშნე თუ არა ან ჩემი კარიერა "არააქტიურია თუ არა" ყოველთვის ნახვების მოსაგროვებლად ვრცელდება, სიმართლეა ეს თუ არა. თუ მნიშვნელოვანი სიახლე მექნება, პირობას გაძლევთ, ამას თავად გაგიზიარებთ", — წერს 31 წლის მსახიობი.

"გაითვალისწინეთ, რომ ამ პერიოდში ჩემი სიჩუმე იმას ნიშნავს, რომ პანდემიასთან ერთად ვცდილობ დროის მშვიდად გაყვანას ისე, როგორც ადამიანების უმეტესობა: ამაოდ ვცადე საფუარიანი პურის გამოცხობა, ვზრუნავ ჩემს საყვარელ ადამიანებზე და მაქსიმალურად ვცდილობ, ხელი შევუშალო ვირუსის გავრცელებას, რომელიც კვლავ უამრავ ადამიანს აზარალებს", — დაამატა უოტსონმა.

ბოლოს კი ასე დაემშვიდობა თავის ერთგულ ფანებს:

"გიგზავნით სიყვარულს და იმედი მაქვს, თავს კარგად და ბედნიერად გრძნობთ, რამდენადაც შეიძლება ასეთ უცნაურ დროებაში ამის მოხერხება. და ისევ, დიდი მადლობა ყველას, ვინც ჩვენი უსაფრთხოებისა და ჯანმრთელობისთვის დაუღალავად შრომობს".