ოლიმპიური მედლისთვის "კბილით გასინჯვის" ტრადიცია რომ ვაჭრების ჩვეულებას უკავშირდება, ეს ალბათ უკვე იცით. ადრე ასე სინჯავდნენ ნამდვილ ოქროს — მონეტაზე კბილის ანაბეჭდი არ უნდა დარჩენილიყო.

ეს განზრახვა ალბათ საერთოდ არ ჰქონია იაპონიის ქალაქ ნაგოიის მერს, ტაკაში კავამურას, როცა სოფტბოლის მოთამაშე მიუ გოტოს გამარჯვება სპორტსმენის ოქროს მედლის "ყბად მოგდებით" იზეიმა. მომენტი, როცა კავამურამ პრიზის კბილით გასინჯვა გადაწყვიტა, პირდაპირი ეთერით გადაიცა და საზოგადოების მწვავე გამოხმაურება მოჰყვა. მოქალაქეების თქმით, კოვიდინფიცირების შემთხვევების მატების დროს ასეთი საქციელი არაჰიგიენურია და უპატივცემულობაა.

ნაგოიის ქალაქის მერიის განცხადებით, მათ 8 ათასზე მეტი საჩივარი მიიღეს კავამურას საქციელთან დაკავშირებით. ზოგიერთი მათგანი თანამდებობიდან მის გადაყენებასაც კი ითხოვს.

თუმცა, 2020 წლის ტოკიოს ოლიმპიადის ორგანიზატორებმა რამდენიმე დღის წინ განაცხადეს, რომ ისინი გოტოს მედალს შეცვლიან და ამის ხარჯებსაც თავად აანაზღაურებენ.

კავამურამ კი პრესკონფერენციაზე ბოდიში მოიხადა, ცვლილების საფასურის ანაზღაურების მზადყოფნაც გამოთქვა და განაცხადა, რომ გოტოს და იაპონიის სოფტბოლის ასოციაციას წერილობით მოუბოდიშა.

მერის საქციელი კი სხვა იაპონელი ოლიმპიელების ყურადღების ცენტრშიც მოექცა.

"ჩემს მედალს ძალიან ნაზად ვეპყრობი", — აღნიშნა ძიუდოისტმა ნაოჰისა ტაკატომ, — "გოტო, რომელსაც ბრაზი არც კი დასტყობია, დიდსულოვანი ადამიანია. მე ნაღდად ვიტირებდი".

უფრო კრიტიკულად შეაფასა მედლის კბილით გასინჯვა ვერცხლისმედალოსანმა მოფარიკავემ, იუკი ოტამ.

"არათუ სპორტსმენის პატივისცემა არ აქვს, ინფიცირების სიტუაციასაც კი არაფრად აგდებს. ჩვენც კი ძირს დავაწყვეთ მედლები დაჯილდოებისას, რათა ვირუსის გავრცელების რისკი არ ყოფილიყო".

ამბავს გამოეხმაურა იაპონიაში მანქანების უდიდესი მწარმოებელი კომპანია, Toyota Motor Corporation, რომელმაც კავამურას საქციელს "შეუფერებელი" უწოდა.

ოლიმპიური თამაშების შემდეგ ტოკიოში ეპიდსიტუაცია გაუარესდა. ოლიმპიადის დაწყების დღეს, 23 ივლისს, ინფიცირების შემთხვევები 1 128-ს შეადგენდა, 4 აგვისტოს კი მონაცემი 5 042-ს გაუტოლდა.

დედაქალაქში ამჟამად საგანგებო მდგომარეობაა გამოცხადებული, თუმცა, ზოგიერთი ექსპერტი მთავრობას მოუწოდებს, ეს პირობა მთელ ქვეყანაზე გავრცელდეს.