თალიბანმა ბოლო საათებში ქვეყნის ჩრდილო-აღმოსავლეთში მდებარე თახარის პროვინციის დედაქალაქ თალოკანის და ჩრდილოეთში მდებარე სამანგანის პროვინციის დედაქალაქ აიბაკის აღება მოახერხეს. ეს არის მეხუთე და მეეექვსე პროვინციის დედაქალაქი, რომელიც თალიბანმა ბოლო ოთხ დღდეში აიღო.

პირველი იყო ნიმროზის პროვინციის დედაქალაქი, ზარანჯი, რომელიც 6 აგვისტოს აიღო და 7 აგვისტოს ჯუზჯანის პროვინციის დედაქალაქი შებერღანი. ირანის საზღვართან მდებარე ზარანჯი ავღანეთის მთავრობისთვის დიდი ეკონომიკური მნიშვნელობის ქალაქი იყო. შებერღანი კი თურქმენთის საზღვართან ახლოს მდებარეობს. კვირას, 8 აგვისტოს, უკვე ყუნდუზის აღება მოახერხა, რომელსაც სამხედრო სტრატეგიული მნიშვნელობა გააჩნია და თალიბანის მიერ დაკავებულ ქალაქებს შორის ყველაზე მრავალრიცხოვანია — არსებული ინფორმაციით, აქ დაახლოებით 375 ათასი ადამიანი ცხოვრობს. კვირასვე თალიბებმა შეტევა განახორციელეს და თითქმის სრულად დაამყარეს კონტროლი სარიპულზე.

CNN-ის ინფორმაციით, მათ გასულ კვირას აშშ-ის ცენტრალური სარდლობის წარმომადგენელმა განუცხადა, რომ აშშ ავღანელი პარტნიორების დასაცავად საჰაერო დარტყმებს ახორციელებს, თუმცა, ადგილი არ დაუკონკრეტებია. ამასთან, ავღანეთის ხელისუფლება აცხადებს, რომ ათობით თალიბანი დაიღუპა. თუმცა, თალიბანის იაერიში არ შეჩერებულა და არსებული ინფორმაციით, ამ დროისთვისაც გრძელდება შეტაკებები.

ვინ აკონტროლებს ავღანეთს? — BBC-ის მიერ 8 აგვისტოს გაკეთებული რუკა. თუმცა, თალიბანის იერიში არ წყდება

ფოტო: BBC

6 აგვისტოს თალიბანმა ავღანეთ-პაკისტანის საზღვარზე მთავარი გამშვები პუნქტი ჩაკეტა და გამოაცხადეს, რომ არავის გადაუშვებენ მეორე მხარეს მანამ, სანამ ისლამაბადი ავღანელებისთვის ვიზის ვალდებულებებს არ გააუქმებს, ან შეამსუბუქებს. გამშვებ პუნქტზე გამავალი გზა ავღანეთისთვის ზღვაზე გასასვლელი მნიშვნელოვანი წერტილია. პაკისტანმა კი საზღვარი მას შემდეგ ჩაკეტა, რაც ივლისში თალიბანმა პაკისტანის საზღვრის მიმდებარე რაიონები გასულ თვეში დაიკავა.

ავთანეთში ძალადობა მას შემდეგ გაიზარდა, რაც აშშ-მა და სხვა საერთაშორისო ძალებმა 20-წლიანი სამხედრო ოპერაციების შემდეგ, 1 მაისიდან ქვეყნიდან ჯარების გაყვანა დაიწყეს. აშშ-ის პრეზიდენტის გადაწყვეტილებით, ამერიკის მისია ავღანეთში დაგეგმილზე ადრე, 31 აგვისტოს, დასრულდება. აშშ-მ მთავარი სტრატეგიული წერტილი — ბაგრამის ავიაბაზა, უკვე დატოვა. ავღანეთში ამერიკელ სამხედროთა მხოლოდ მცირე ჯგუფი რჩება და ისინი საელჩოს დაიცავენ. ივნისის ბოლოს The Wall Street Journal-მა აშშ-ის დაზვერვის სამსახურთან დაახლოებული პირების ინფორმაციაზე დაყრდნობით გაავრცელა, რომ დაზვერვის სამსახურის დასკვნით, რომელიც ჯერ ოფიციალურად არ გამოქვეყნებულა, აშშ-ის ძალების მიერ ავღანეთის დატოვებიდან 6 თვეში შესაძლოა, ქაბულის მთავრობა დაეცეს.

გაიგეთ მეტი: