12 აგვისტოს, ბათუმში, Palm Beach-ზე ლექს-სენის კონცერტი იმართება. ამასთან დაკავშირებით, ხელოვანი ფეისბუქზე წერს, რომ გასართობ ღონისძიებაში მონაწილე გუნდის ყველა წევრი აცრილია და სიცრუეა ის განცხადება, რომ თითქოს კორონავირუსი "კონცერტებიდან აქტიურდება".

მან მსმენელსაც მოუწოდა ვაქცინაციისკენ.

"ასევე მოგიწოდებთ ყველას აიცერით მოვიშოროთ ეს ტანჯვა და გავატაროთ ზაფხულის ეს დარჩენილი რამდენიმე დღე შედარებით ნორმალურად!"

ლექს-სენის პოსტს მისი ერთ-ერთი გამომწერი ირონიულად გამოეხმაურა და ჰკითხა, იმიტომ თუ მოუწოდებდა მოქალაქეებს ვაქცინაციისკენ, რომ კონცერტებზე ევლოთ, რასაც შემსრულებელმა შემდეგნაირად უპასუხა:

"[უნდა აიცრათ] იმიტომ რომ ჯანმრთელად იყოთ, თქვენი დასწრება არაა სჭირო".

გამომდინარე იქიდან, რომ როგორც COVID-19, ასევე COVID-19-ის საწინააღმდეგო ვაქცინაც ახალია, ჯანდაცვის ექსპერტებმა ამ ეტაპზე ზუსტად არ იციან რამდენი ხნის განმავლობაშია დაცული ადამიანი ინფექციის გადატანის ან ვაქცინაციის შემდეგ. თუმცა ზუსტად არის ცნობილი ის, რომ COVID-19-მა უამრავი გართულება და სიკვდილი გამოიწვია მსოფლიოში და ვაქცინაცია ამისგან გვიცავს.

ექსპერტები ამბობენ, რომ მუსიკალურ ფესტივალზე დასწრება ვაქცინირებული ადამიანებისთვის შედარებით უსაფრთხოა, განსაკუთრებით ღია სივრცეში, თუ ისინი ხალხმრავლობაში პირბადეს ატარებენ და ჰიგიენასა და სოციალურ დისტანციაზე რეკომენდაციებს დაიცავენ.