მეთ ჰენკოკი, დიდი ბრიტანეთის ჯანდაცვის აწ უკვე ყოფილი მინისტრი, მას შემდეგ გადადგა, რაც პანდემიისას დაწესებული უსაფრთხოების დისტანცია კოლეგასთან კოცნით დაარღვია.

BBC-ის ინფორმაციით, ჰენკოკი სკანდალში ბრიტანული ტაბლოიდის მიერ გამოქვეყნებული ფოტო და ვიდეოჩანაწერების გამო აღმოჩნდა, სადაც ჩანს, თუ როგორ ეხვევა და კოცნის ეს მნიშვნელოვანი სახელმწფო ფიგურა სამსახურში თავის თანაშემწეს. აღნიშნული კადრები, სავარაუდოდ, მაისშია გადაღებული.

აღსანიშნავია, რომ მეთ ჰენკოკი დაქორწინებული იყო და სამი შვილის მამაა. ამ ფაქტის გახმაურების შემდეგ, გავრცელებული ინფორმაციით, მას ცოლი, მართა, 15-წლიანი ქორწინების შემდეგ დაშორდა.

ჰენკოკმა 26 ივნისს პრემიერმინისტრ ბორის ჯონსონს გადადგომის შესახებ აცნობა. დიდი ბრიტანეთის ჯანდაცვის ყოფილმა მინისტრმა ტვიტერის პირად ანგარიშზეც გამოაქვეყნა ვიდეომიმართვა:

"ვიაზრებ იმ უზარმაზარ მსხვერპლს, რაც ამ ქვეყანაში პანდემიის გამო ყველამ გაიღო და პირებმა, რომლებმაც ეს შეზღუდვები შემოიღეს, თავადვე უნდა დაიცვან წესები, ამიტომაც უნდა გადავდგე", — განაცხადა მან.

Reuters-ის ცნობით, 42 წლის მეთ ჰენკოკი ბრიტანეთის მთავრობის მიერ შემუშავებული პანდემიის საწინააღმდეგო ბრძოლის სათავეში იდგა და მედიის საშუალებით ხშირად მოუწოდებდა მოსახლეობას, რომ მკაცრი შეზღუდვები დაეცვათ.

ოპონენტები, რომლებმაც მეთ ჰენკოკი გავრცელებული კადრების გამო გააკრიტიკეს, აცხადებდნენ, რომ ის იქამდე უნდა გადაეყენებინათ, სანამ თვითონ დაწერდა თანამდებობის დატოვების შესახებ განცხადებას.