საქართველოს ყოფილმა პრემიერმინისტრმა, გიორგი გახარიამ პარტია საქართველოსთვის დააფუძნა, რომლის პრეზენტაციაც ხვალ, 29 მაისს გაიმართება. On.ge დაინტერესდა, რა ქონებას ფლობს ყოფილი მაღალჩინოსანი და ამის გასაგებად მისი ქონებრივი დეკლარაცია შეისწავლა.

დეკლარაცია გიორგი გახარიამ ბოლოს 2021 წლის 18 აპრილს შეავსო, რომელიც როგორც მისი, ასევე მისი ცოლის ქონების შესახებ ინფორმაციას მოიცავს.

ოფიციალური დოკუმენტის მიხედვით, გახარიას მფლობელობაშია ჩხოროწყუს მუნიციპალიტეტში მდებარე 2 290 კვ.მ მიწის ნაკვეთი, რომელიც ყოფილმა პრემიერმა 2020 წელს განვადებით შეიძინა — ამ უძრავი ქონების ღირებულება ჯამში 85 000 ლარია, თუმცა გახარია მას სამ ეტაპად დაფარავს. 2020 წელს მან ამ მიწის ნაკვეთისთვის მხოლოდ ნაწილი, 25 000 ლარი გადაიხადა.

გიორგი გახარიას ცოლის, მარიკა ფანცულაიას საკუთრებაშია 83 კვ.მ-ის ბინა საფრანგეთში, პარიზის გარეუბანში — ეს ქონება ყოფილი პრემიერის ოჯახმა 2020 წელს 472 400 ევროდ შეიძინა. დეკლარაციის მიხედვით, ბინა დანაზოგით შეიძინეს.

გარდა ამისა, მარიკა ფანცულაია 2016 წლიდან ფლობს Toyota RAV 4-ის ფირმის ავტომანქანას, რომლის ყიდვის სანაცვლოდაც 22 000 დოლარია გადახდილი.

საჯარო ინფორმაციაზე დაყრდნობით შეგვიძლია ვთქვათ, რომ 2020 წელს გიორგი გახარიამ საქართველოს პრემიერმინისტრად მუშაობის სანაცვლოდ ბიუჯეტიდან 41 004 ლარის ხელფასი აიღო. დეკლარაციის შევსების მომენტისთვის გახარიას ყველა საბანკო ანგარიშზე ჯამურად 14 419 ლარი ირიცხებოდა. რაც შეეხება ყოფილი პრემიერის ცოლის სახელფასო ანაზღაურებას, ირკვევა, რომ მარიკა ფანცულაიამ 2020 წელს ავერსის კლინიკაში ექიმად მუშაობის სანაცვლოდ 11 084 ლარის ანაზღაურება მიიღო.

აქვე უნდა აღინიშნოს, რომ 2020 წელს გახარიას ცოლმა 20 309 დოლარის სადეპოზიტო სარგებელი მიიღო. დოკუმენტის შევსების მომენტისთვის ოჯახს სადეპოზიტო ანგარიშზე თანხები არ ერიცხებოდა.

ქონებრივი დეკლარაცია ხარჯების ნაწილსაც მოიცავს, სადაც აღნიშნულია, რომ 2020 მარიკა ფანცულაიამ უძრავი ქონების ქირავნობის სანაცვლოდ 39 000 ლარი დახარჯა. ასევე, დოკუმენტის მიხედვით, 2020 წელს, გახარიამ და მისმა ცოლმა შვილის სწავლის საფასური — 3 660 ევრო გადაიხადეს.