ისრაელის პრემიერმინისტრმა, ბენიამინ ნეთანიაჰუმ კოალიციური მთავრობა ვერ ჩამოაყალიბა. მისთვის მიცემულ 28-დღიან ვადაში მან ვერ მოახერხა მთავრობის მხარდაჭერისთვის დეპუტატების ხმების უმრავლესობის მოპოვება.

პრეზიდენტი რუვლენ რივლინი საპარლამენტო პარტიების ლიდერებთან კონსულტაციებს გამართავს, რათა სამომავლო გეგმები გადაწყდეს. პრეზიდენტს შეუძლია ნეთანიაჰუს კიდევ 14 დღე მისცეს ან კოალიციის ფორმირებისთვის 28-დღიანი დრო სხვა პარტიის ლიდერს გამოუყოს. ამ შემთხვევაში დიდი ალბათობით ეს ცენტრისტული პარტიის იეშ ატიდის ლიდერი, იარ ლაპიდი იქნება.

23 მარტის საპარლამენტო არჩევნების შედეგად, ნეთანიაჰუს პარტია ლიკუდს საკანონმდებლო ორგანოში ყველაზე მეტი — 120-დან 30 მანდატი აქვს მოპოვებული. მოკავშირე პარტიებთან ერთად ნეთანიაჰუ 52 ხმას აგროვებდა, თუმცა მხარდაჭერისთვის 61 დეპუტატის ხმა არის საჭირო. ამის პარალელურად ნეთანიაჰუ ბრალდებულია ქრთამის, თაღლითობისა და ძალაუფლების ბოროტად გამოყენების საქმეებში.

ნათენიაჰუმ კოალიციური მთავრობა გასული წლის აპრილში თავის ერთ-ერთ მთავარ ოპონენტთა,ნ ბენი განცთან ერთად ჩამოაყალიბა. პრემიერის პოსტი მათ მონაცვლეობით უნდა დაეკავებინათ, თუმცა 2020 წლის დეკემბერში კოალიცია დაიშალა.

თუ მთავრობის ჩამოყალიბების მცდელობები კვლავ უშედეგო იქნება, ისრაელს წინ კიდევ ერთი არჩევნები ელოდება. ბოლო ორ წელში ქვეყანაში ოთხი არჩევნები ჩატარდა.