სახალხო დამცველი უჩა ნანუაშვილი მართლმადიდებელი ეკლესიის პატრიარქს, ილია მეორეს შეხვდა. შეხვედრის შემდეგ ნანუაშვილმა თქვა, რომ ილია მეორეს დეკანოზ გიორგი მამალაძესთან შეხვედრის სურვილი აქვს:

:ის არის დაინტერესებული უფრო მეტი ინფორმაცია გაიგოს, კონკრეტულად რა მოხდა და იმედი აქვს, მალე ყველაფერს ნათელი მოეფინება. ის ასევე საუბრობდა იმაზე, რომ აუცილებელია მაქსიმალურად დაწყნარდეს სიტუაცია და ყველაფერი გავაკეთოთ იმისთვის, რომ მღელვარება დაცხრეს და სიმართლე გაირკვეს უახლოესი დღეების განმავლობაში. დეკანოზთან შეხვედრის სურვილი პატრიარქსაც ჰქონდა:.

სამართალდამცავებმა დეკანოზი გიორგი მამალაძე მიმდინარე წლის 10 თებერვალს, თბილისის საერთაშორისო აეროპორტში დააკავეს. პროკურატურის მტკიცებით, მისი ბარგის ჩხრეკისას აღმოაჩინეს მომწამლავი ნივთიერება ციანიდი. როგორც საგამოძიებო უწყებამ განაცხადა, ის მიემგზავრებოდა ბერლინში, სადაც იმჟამად პატრიარქი იმყოფებოდა, სადაც იგეგმებოდა "მაღალი იერარქიის სასულიერო პირის მკვლელობა".

პროკურატურამ მოგვიანებით თქვა, რომ მათ პატრიარქი არ უგულისხმიათ. საგამოძიებო უწყებამ მამალაძის ადვოკატებს გაუთქმელობის დოკუმენტზე მოაწერინა ხელი, თუმცა, დეკანოზის ახალმა ადვოკატმა 20 თებერვალს თქვა, რომ მამალაძეს არა სასულიერო იერარქის, არამედ პატრიარქის მდივან-რეფერენტის, შორენა თეთრუაშვილის მკვლელობის მცდელობას ედავებიან.