ოპოზიცია რუსთავის ციხესთან ნაციონალური მოძრაობის თავმჯდომარის, ნიკა მელიას მხარდასაჭერად მივიდა. ისინი თბილისიდან, რესპუბლიკის მოედნიდან მსვლელობით დაიძრნენ და საპროტესტო აქციით რუსთავში გადაინაცვლეს.

ნაციონალური მოძრაობის ერთ-ერთი წევრის, ზაალ უდუმაშვილის განცხადებით, ისინი იქ მისვლით სოლიდარობას უცხადებენ მელიას და მის დაპატიმრებას კიდევ ერთხელ აპროტესტებენ.

"დღეს მოვედით აქ იმისთვის, რომ ჩვენი მხარდაჭერა გამოვუცხადოთ ჩვენს მეგობარს. ყველა ხედავდა გუშინ, რა ხდებოდა ნაციონალური მოძრაობის ოფისში. ნიკა აქ უნდა იჯდეს და იმ ბრძანების გამცემები გარეთ უნდა დადიოდნენ? ეს არის ამ ქვეყანაში უსამართლობა და ეს უნდა შეიცვალოს", — უთხრა მან მთავარი არხის ჟურნალისტს.

ოპოზიციის ლიდერებმა აქცია დააანონსეს 26 თებერვალსაც. ისინი მელიას დაკავებას აპროტესტებენ და ამბობენ, რომ დანებებას არ აპირებენ.

23 თებერვალს, სპეცრაზმმა ნიკა მელია დააკავა. სამართალდამცავები პარტიის ოფისში გამთენიისას გამოჩნდნენ — რამდენიმე საათში მას შემდეგ, რაც ირაკლი ღარიბაშვილი პრემიერმინისტრად აირჩიეს.

სპეცრაზმი შენობაში შევიდა როგორც სახურავიდან, ისე პირველ სართულზე არსებული შესასვლელებიდან. თავდაპირველად, მათ პირველ სართულზე მყოფი ადამიანები გამოიყვანეს, მოგვიანებით კი, ნიკა მელიას ოთახს მიადგნენ, სადაც ის ოპოზიციის სხვა ლიდერებთან და მხარდამჭერებთან ერთად იმყოფებოდა. მათ ოთახში გამოიყენეს გაზიც. შსს-ს ინფორმაციით, მელიას გარდა, 21 ადამიანი დააკავეს. მათ პოლიციის კანონიერი მოთხოვნისადმი დაუმორჩილებლობას ედავებიან.

თავდაპირველად, ნიკა მელიას დაპატიმრება ყოფილი პრემიერმინისტრის, გიორგი გახარიას გადადგომის გამო გადაიდო. გადადგომა გახარიამ ნიკა მელიას საქმეს დაუკავშირა და თქვა, რომ გუნდში ამაზე "აზრთა სხვადასხვაობა" იყო.

17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.