პარტია მოქალაქეების ლიდერმა, ალეკო ელისაშვილმა შინაგან საქმეთა მინისტრობის კანდიდატს, ვახტანგ გომელაურს მიმართა კითხვით, თუ სად იყო ბადრი ესებუა და ფიქრობს თუ არა, რომ ზუგდიდის ოპერაციის შემდეგ მისი მხრიდან უფრო მართებული იქნებოდა, თუ ახალ მინისტრთა კაბინეტში მისი გვარი აღარ იქნებოდა.

"ბატონ გომელაურთან მაქვს შეკითხვა. ბატონო ვახტანგ, ერთი ასეთი კითხვა მაქვს, სად არის ბადრი ესებუა? საქართველოს ტერიტორიაზეა, თუ მან დატოვა საქართველოს ტერიტორია იმ ხურჯინით, რომელშიც ჩავუწყვეთ ნახევარი მილიონი დოლარი და მიგაჩნიათ თუ არა, რომ ზუგდიდის ოპერაციის შემდეგ თქვენი მხრიდან გაცილებით მართებული და საპასუხისმგებლო იქნებოდა, რომ ახალ მინისტრთა კაბინეტში თქვენი გვარი აღარ ყოფილიყო?", — განაცხადა ელისაშვილმა.

მეორე დღეა საკანონმდებლო ორგანოში მინისტრობის კანდიდატებს უსმენენ. ორშაბათს კი პარლამენტი ახალ პრემიერმინისტრსა და მთავრობის კაბინეტს დაამტკიცებს.

მინისტრთა კაბინეტის ახალი შემადგენლობისა და მთავრობის მეთაურის დამტკიცება მას შემდეგ გახდა აუცილებელი, რაც 18 თებერვალს გიორგი გახარიამ პრემიერმინისტრის თანამდებობა დატოვა.