ნაციონალური მოძრაობის თავმჯდომარის, ნიკა მელიას განცხადებით, ის პარტიის ოფისიდან გასული იყო და დაბრუნდა. მისი თქმით, ამის შესახებ ჟურნალისტებს წინასწარ არ აცნობა, თუმცა ფოტო-ვიდეომასალა მოგვიანებით გამოაქვეყნებს.

მელიას თქმით, პოლიცია პარტიის ოფისიდან გასული მანქანების საბარგულს ამოწმებს, მაგრამ ის არ აპირებს, რომ საბარგულით იმგზავროს.

"მე შენობიდან გასულიც ვიყავი და შემოსულიც ვარ. მედიას წინასწარ რო ვერ გაცნობებთ როდის გავდივარ და შემოვდივარ, ესეც არ უნდა გაგიკვირდეთ. ვაღიარებ, შენობიდან გასულიც ვიყავი და შემოსულიც ვარ და თუ სად ვიყავი გასული, ამის დამადასტურებელი ვიდეო და ფოტომასალაც მოგეწოდებათ.

სწორედ ამიტომაც არიან შეწუხებულები ხელისუფლებაში და გუშინდელი დღიდან თითოეული ავტოსატრანსპორტო საშუალება, რომელიც ტერიტორიას ტოვებს, ჩერდება და საბარგულს უმოწმებენ. ერთ რამეს ნამდვილად ვპირდები, რომ ისე არ გავალ ამ შენობიდან, რომ საბარგულში მოვთავსდე", — განაცხადა მან.

17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა.

მელია ამბობს, რომ ვერ დაიჭერენ და ამაში მას მხარდაჭერას უცხადებს ოპოზიციაც. ნაციონალური მოძრაობის ოფისში ოპოზიციური პარტიების ლიდერები იმყოფებიან და მელიას დასაცავად "მორიგეობენ".

18 თებერვალს, დილით პოლიცია ენმ-ის ოფისთან მივიდა, თუმცა აქტივისტებმა შენობაში არ შეუშვეს. ამის შემდეგ შსს-მ გავრცელა განცხადება და პოლიტიკოსებსა და მხარდამჭერებს მოუწოდა, პოლიციას ხელი არ შეუშალონ სასამართლოს გადაწყვეტილების აღსრულებაში.

ნიკა მელიასთვის პატიმრობის შეფარდებიდან რამდენიმე საათში, საქართველოს პრემიერმინისტრი, გიორგი გახარია გადადგა. მან გადადგომის მიზეზად სწორედ ამ საქმესთან დაკავშირებით გუნდში არსებული აზრთა სხვადასხვაობა დაასახელა. პრემიერის გადადგომის შემდეგ შინაგან საქმეთა სამინისტრომ აღსრულების ღონისძიება გადადო.