რუსეთში ოპოზიციონერი ალექსეი ნავალნის სასამართლო სხდომა მიმდინარეობს. სასჯელების აღსრულების ფედერალური სამსახური პოლიტიკოსისთვის მოითხოვს, რომ პირობითი მსჯავრი რეალურით — სამი წლითა და ექვსი თვით ჩანაცვლდეს.

ადგილობრივი გამოცემები წერენ, რომ ნავალნის სასამართლოზე სხვადასხვა დიპლომატიური კორპუსის წარმომადგენლები მივიდნენ. როგორც TV Rain-ის-ის კორესპონდენტი იტყობინება, მანქანები დიპლომატიური ნომრებით სასმართლოს შენობასთან იყო გაჩერებული. მათ შორის იყვნენ ჩეხეთის, ავსტრიის, ლიეტუვის, ნორვეგიის, შვეიცარიის, ნიდერლანდების, აშშ-ს, კანადის, გერმანიის, შვეიცარიის, დიდი ბრიტანეთის, ლატვიის, პოლონეთისა და ევროკავშირის წარმომადგენლები.

პრეზიდენტ ვლადიმერ პუტინის პრესსპიკერმა, დმიტრი პესკოვმა განაცხადა, რომ დიპლომატებს უფლება აქვთ ვენის კონვენციის შესაბამისად მოიქცნენ, თუმცა არ დაუშვან ქმედებები, რომლებიც შესაძლოა "დამოუკიდებელ სასამართლოზე ზეწოლად" ასოცირდებოდეს.

საგარეო საქმეთა სამინისტროს ოფიციალურმა წარმომადგენელმა, მარია ზახაროვამ განცხადება გაავრცელა, სადაც აღნიშნა, რომ სხვა ქვეყნის დიპლომატები თავიანთი ქვეყნის მოქალაქეების სასამართლოებს ესწრებიან და ამას "დასავლეთის თვითგამოაშკარავება უწოდა".

"იმ შემთხვევაშიც თუ დასავლელები ნავალნის "თავისიანად" განიხილავენ, ის რუსეთის მოქალაქეა. ეს უკვე აღარაა მხოლოდ სუვერენული სახელმწიფოს შიდა საქმეებში ჩარევა. ეს არის რუსეთის შეკავების მცდელობებში კოლექტიური დასავლეთის უსიამოვნო და უკანონო როლი", — განაცხადა მან.

გარდა ამისა, საგარეო საქმეთა მინისტრმა, სერგეი ლავროვმა განაცხადა, რომ მათ ყველანაირი საფუძველი აქვთ იფიქრონ, რომ ნავალნის მოწამვლა ინსცენირებული იყო.

ალექსეი ნავალნი მოსკოვის აეროპორტში 17 იანვარს დააკავეს, როცა ის გერმანიიდან ბრუნდებოდა, სადაც ნოვიჩოკით მოწამვლის შემდეგ მკურნალობდა. დაკავებიდან მეორე დღეს პოლიციის განყოფილებაში გამართულ სასამართლო პროცესზე მას 30-დღიანი პატიმრობა შეუფარდეს.