ტელეკომპანია GDS-ის 100–პროცენტიანი წილი ტელეკომპანია იმედის მფლობელმა კომპანიამ, შპს ჯორჯიან მედია პროდაქშენ გრუპმა იყიდა. მხარეებს შორის ხელშეკრულება რამდენიმე დღის წინ, 27 იანვარს გაფორმდა. ცვლილებების საჯარო რეესტრში უკვე ასახულია.

როგორც ხელშეკრულებიდან ირკვევა, ბერა ივანიშვილმა GDS-ის 100-პროცენტიანი წილი შპს მედია პროდაქშენ გრუპს დაუთმო. ტელეკომპანია GDS-ის ღირებულებასა და გადახდის წესებს მხარეები, ცვლილებების საჯარო რეესტრში ასახვიდან 7 თვის განმავლობაში, დამატებითი შეთანხმების საფუძველზე დაადგენენ.

ფოტო: საჯარო რეესტრი

შპს ჯორჯიან მედია პროდაქშენის 100–პროცენტიანი წილი ინა გუდავაძეს ეკუთვნის. ტელეკომპანია GDS-ის 100 პროცენტი კი, ბოლო დრომდე საქართველოს ყოფილი პრემიერმინისტრის, მილიარდერის, ბიძინა ივანივშილის შვილს, ბერა ივანიშვილს ეკუთვნოდა.

ტელეკომპანია იმედმა 2016 წლის 27 დეკემბერს მფლობელის - ჰოლდინგი იმედის განცხადება გაავრცელა. განცხადების მიხედვით, ჰოლდინგმა მაესტროს საკონტროლო პაკეტი შეიძინა და 2017 წლიდან მაესტრო იმედის ნაწილი ხდებოდა. თუმცა, საჯარო რესტრში მაესტროს წილების ცვლილების შესახებ ინფორმაცია ამ დრომდე ასახული არაა.