მსახიობმა და კალიფორნიის ყოფილმა გუბერნატორმა, არნოლდ შვარცენეგერმა, ტვიტერზე ვიდეომიმართვა გაავრცელა, სადაც ხალხს ერთიანობისკენ მოუწოდა. ვიდეოში შვარცენეგერმა ასევე აღნიშნა, რომ ტრამპი აშშ-ის ისტორიაში ყველაზე საშინელ პრეზიდენტად დარჩება, ამერიკელებს კი მოუწოდა, ახლადარჩეულ ჯო ბაიდენს მხარი დაუჭირონ.

"ერთად უნდა გავთავისუფლდეთ იმ დრამისგან, რაც მოხდა", — ამბობს შვარცენეგერი შვიდწუთნახევრიან ვიდეოში, — "უნდა გავთავისუფლდეთ, არა როგორც რესპუბლიკელები ან დემოკრატები, არამედ, როგორც ამერიკელები".

მსახიობმა, რომელიც წარმოშობით ავსტრიიდანაა, ბავშვობაც გაიხსენა და მეორე მსოფლიო ომის შემდგომი სამშობლოს მაგალითზე გამუდმებული ტყუილებისა და შეუწყნარებლობის საფრთხის შესახებ ისაუბრა.

ტრამპის მხარდაჭერების კაპიტოლიუმში შეჭრა მან კრისტალნახტს, იგივე "ბროლის ღამეს" შეადარა, როცა ნაცისტებმა გერმანიასა და ავსტრიაში ებრაული თემები, სინაგოგები და ობიექტები დაარბიეს.

"ოთხშაბათს ბროლის ღამე პირდაპირ შეერთებულ შტატებში იყო", — განაცხადა შვარცენეგერმა და კაპიტოლიუმის შენობის ჩამსხვრეულ ფანჯრებზე მიანიშნა. მისი თქმით, "ბრბომ ასევე დაამსხვრია ის იდეები, რომლებიც ვერ დააფასეს" და "გადააბიჯა იმ პრინციპებს, რომელზეც ქვეყანა დაფუძნდა".

შვარცენეგერმა გაიხსენა, რომ ავსტრიაში იგი იმ კაცების გარემოცვაში გაიზარდა, ვინც "ისტორიის ყველაზე სასტიკი რეჟიმის თანამონაწილეობით გამოწვეულ დანაშაულის გრძნობას სასმლით იქარვებდა", თუმცა "ბევრი მათგანი გამოსწორდა და შემობრუნდა, ნაბიჯ-ნაბიჯ, მომავლისაკენ".

მსახიობმა მამამისთან დაკავშირებული პირადი ისტორიაც გაიხსენა, რომელიც მეორე მსოფლიო ომის პერიოდში ნაცისტური პარტიის წევრი იყო.

"ამაზე საჯაროდ არასდროს მისაუბრია, რადგან მტკივნეული მოგონებაა, თუმცა მამაჩემი კვირაში ერთხელ ან ორჯერ შინ მთვრალი მოდიოდა, ყვიროდა და მე და დედაჩემს გვცემდა", — იხსენებს შვარცენეგერი. მისი თქმით, მამამისისნაირი კაცები "ფიზიკურ ტკივილსაც განიცდიდნენ სხეულში დარჩენილი ნამსხვრევების გამო და ემოციურსაც — იმისთვის, რაც ნახეს ან ჩაიდინეს".

ამის შემდეგ, ყოფილმა რესპუბლიკელმა გუბერნატორმა ყურადღება მოქმედი პრეზიდენტისაკენ მიაპყრო.

"პრეზიდენტი ტრამპი სამართლიანი არჩევნების შედეგების შეცვლას ტყუილებით და ხალხის შეცდომაში შეყვანით შეეცადა", — განაცხადა შვარცენეგერმა, — "მამაჩემი და ჩემი მეზობლებიც ტყუილებით იყვნენ შეცდენილნი და ისიც კარგად ვიცი, სად მივყავართ ასეთ ტყუილებს".

მან ასევე დასძინა, რომ ტრამპმა, როგორც ლიდერმა, მარცხი განიცადა, თუმცა "კარგი ამბავი ისაა, რომ ცოტა ხანში იგი ისეთივე არარელევანტური იქნება, როგორც ძველი ტვიტი".

შვარცენეგერმა იმ სახელმწიფო მოხელეებსაც მიმართა, ვინც პრეზიდენტი დაამტკიცა. კონკრეტული პირების დასახელების გარეშე, მან აღნიშნა, რომ მისი პარტიის რამდენიმე წევრმა "გაუბედაობა" გამოიჩინა და მათი "თანამონაწილე" გახდა, ვინც ამბოხის მოწყობა სცადა.

"თუმცა ამან არ გაამართლა. ჩვენი დემოკრატია მედგრად დაუდგა", — ამ დროს მსახიობმა მის ერთ-ერთ ფილმში გამოყენებული ხმალი ხელში აიღო და აღნიშნა, რომ მათი "დემოკრატია ფოლადის მახვილს ჰგავს — რაც უფრო იწრთობა, მით მეტად მტკიცდება".

დასასრულს შვარცენეგერმა ახლადარჩეულ ჯო ბაიდენს წარმატება უსურვა და მხარდაჭერა აღუთქვა.

"მათ კი, ვინც ფიქრობს რომ შეერთებული შტატების კონსტიტუციის შეცვლა შეუძლიათ, ეს იცოდეთ", — დასძინა ბოლოს, — "ვერასდროს გაიმარჯვებთ".