ჯანდაცვის მინისტრის მოადგილე, თამარ გაბუნია განმარტავს, რომ საქართველოში ლაბორატორიების კონტროლის სხვადასხვა მექანიზმი არსებობს და ეს სფერო მკაცრად კონტროლირებადია. ასე გამოეხმაურა ის კითხვას, რამდენად სანდოა ტესტირების შედეგები, როცა ზოგიერთი მოქალაქეს კორონავირუსის ტესტზე ჯერ უარყოფით, შემდეგ კი დადებით პასუხებს ეუბნებიან, რაც კითხვის ნიშნის ქვეშ აყენებს ხარისხის საკითხს.

"ლაბორატორიები, რა თქმა უნდა, კონტროლდება. ლუგარის ლაბორატორია არის ჩვენთვის რეფერენტ ლაბორატორია კოვიდთან დაკავშირებულ ტესტირებაზე, ასევე, რეგულირების საგენტო განსაზღვრავს ძირითად მოთხოვნებს, რაც მოეთხოვებათ პოლიმერული ჯაჭვური რეაციის, ანუ PCR ტესტის შემსრულებელ ლაბორატორიებს. [...]

სხვა შემთხვევაშიც ლაბორატორიების კონტროლი ხდება, როდესაც საზოგადეობრივი ჯანდაცვის ლაბორატორიებზეა საუბარი, ჩვენ გვაქვს კონტროლის რამდენიმე მექანიზმი: ნაციონალური ხარისხის კონტროლი და სუპრანაციონალური კონტროლი, მაგალითად, ტუბერკულიოზის პროგრამაში, როდესაც ანტვერპენის ლაბორატორიიას აქვს პასუხისმგებლობა იმაზე, რომ ჩვენ გაგვიწიოს მეთვალყურეობა ხარისხის კონტროლის კუთხით. ამდენად ეს არის ძალიან მკაცრად კონროლირებადი სფერო", — განაცხადა მან.

გარდა ამისა, გაბუნიამ აღნიშნა, რომ ანიტეგენის ტესტი საქართველოს მასშტაბით 300 სხვადასხვა ლოკაციაზე ჩატარდება და ისაუბრა იმაზეც, თუ რა არის მნიშვნელოვანი ამ ტესტირებისას ხარისხის უზრუნველსაყოფად.

"ამ შემთხვევაში როდესაც ჩვენ ვსაუბრობთ სამას ადგილზე, ეს არ არის ყველა შემთხვევაში PCR ლაბორატორია, ეს არის ნაცხის აღების ადგილები. ამ შემთხვევაში კლინიკებში ერთადერთ მოთხოვნა რომელიც დგება ანტიგენ ტესტზე, ეს არის ინფექციის კონტროლის პირობების დაცვა, რიგის მოწესრიგება, ნაკადების გამიჯვნა, რომ სიცხიანი პაციენტი არ შეხვდეს სხვა პაციენტებს და ასევე, რა თქმა უნდა, ექიმების და ექთნების მიერ პირადი დაცვის საშუალების გამოყენება. სულ ეს არის.

ანტიგენისთვის განსაკუთრებული მოთხოვნები საჭირო არ არის, რა თქმა უნდა. ანტიგენის მთავარი ხარისხის კონტროლის პირობა არის ის, რომ ჯანმრთელობის მსოფლიო ორგანიზაციის მიერ იყოს პრეკვალიფიცირებულია და ესეთ არის ის ტესტი, რომელსაც ჩვენ ვიყენებთ ქვეყანაში. ძალიან მაღალი ხარისხისაა და იძლევა იმის გარანტიას, რომ ცდომილება იყოს ძალიან დაბალი", — განაცხადა მან.

მანვე აღნიშნა, რომ ამ ტესტის შედეგი უფრო სარწმუნო არის სიმპტომიან პირებში და მოუწოდა მოქალაქეებს, რომ სიმპტომის არარსებობის შემთხვევაში ეს ტესტი არ ჩაიტარონ.

"თუმცა წინასწარ ისიც ვიცით რა მახასიათებლები აქვს ტესტს, ამიტომ ტესტი ყველაზე მგრნობიარე და სარწმუნო არის სიმპტომიან პირებში. როდესაც ადამიანს სიმპტომი არ აქვს და ინტერესის გამო სურს სწრაფი ანტიგენ ტესტის ჩატარება, რა თქმა უნდა, არ არის ინფორმატიული და ამას არცერთ შემთხვევაში არ ვურჩევთ", — განაცხადა გაბუნიამ.

თავდაპირველად საქართველოში კორონავირუსზე ტესტს მხოლოდ ლუგარის ლაბორატორია ატარებდა, თუმცა მოგვიანებით ეს ფუნქცია ქვეყნის მასტაბით სხვადასხვა კლინიკასა და ლაბორატორიაზე გადანაწილდა.