საქართველოს ენერგეტიკის განვითარების ფონდის განცხადებით, იგეგმება ინვესტორის მოძიება, რომელთან ერთადაც დააფუძნებს საერთო საწარმოს ზესტაფონის ქარის ელექტროსადგურის პროექტის განვითარებისა და მშენებლობის მიზნით.

აღნიშნულის შესახებ ფონდმა დღეს, 18 იანვარს განცხადება გაავრცელა. მათივე ცნობით, ელექტროსადგურის საპროექტო არეალი მდებარეობს იმერეთის რეგიონში, კერძოდ, ზესტაფონის მიმდებარე ტერიტორიაზე და მისი სავარაუდო დადგმული სიმძლავრე 150 მგვტ. იქნება, გამომუშავებული ელ. ენერგია კი - 478,2 მლნ. კვტ/საათი. პროექტის თანახმად, ტურბინების რაოდენობა იქნება 50 ერთეული, ხოლო თითო ტურბინის დადგმული სიმძლავრე - 3 მეგავატი.

საერთო ჯამში, პროექტის ღირებულება 227 მილიონი აშშ დოლარი იქნება.

ენერგეტიკის განვითარების ფონდის განცხადებით, დაინტერესებულ პირებს შეუძლიათ, რომ გამოხატონ ინტერესი და წარადგინონ სატენდერო დოკუმენტაცია არაუგვიანეს 2017 წლის 20 თებერვლის 18 საათისა.

ქარის პირველი 20,7 მეგავატიანი ელექტროსადგური გორის ტელერადიო ანძის მიმდებარე ტერიტორიაზე აშენდა. მისი საერთო ღირებულება 34 მილიონი აშშ დოლარია, რომლიდანაც 24 მილიონი ევროპის რეკონსტრუქციისა და განვითარების (EBRD) ბანკის მიერ დაფინანსდა.