იგორ გიორგაძემ მედიასაშუალება dfwatch-ს სასამართლოში უჩივლა. ის მედიას არასწორი ინფორმაციის გავრცელებას ედავება, რომლითაც "დაირღვა უდანაშაულობის პრეზუმფცია და მოსარჩელეს პატივსა და ღირსებას მიადგა ზიანი". სასამართლოში მისი წარმომდგენელი გაგი მოსიაშვილია.

როგორც მოსიაშვილი On.ge-ს უყვება, მედიასაშუალებამ გიორგაძის შესახებ მცდარი იფნორმაცია გაავრცელა, იმის შესახებ, რომ გიორგაძეს 1995 წელს 17-წლიანი პატიმრობა ჰქონდა მისჯილი. ადვოკატის თქმით, არ არსებობს გიორგაძის მიმართ კანონიერ ძალაში შესული გადაწყვეტილება.

„ჩვენ ვითხოვთ ინფორმაციის გასწორებას, სწორი ინფორმაციის მიწოდებას საზოგადოებისთვის იმავე საშუალებით, რა საშუალებითაც საზოგადოებას მიაწოდეს არასწორი იფნორმაცია,“ - ამბობს გაგი მოსიაშვილი.

როგორც საქმის ადვოკატი აღნიშნავს, მათ მედიასაშუალებას ინფორმაციის შესწორების მოთხოვნითაც მიმართეს. კომუნიკაციას ადასტურებს dfwatch-ს მთავარი რედაქტორი ლაშა ტუღუში. მისი თქმით, მათ არ გაიზიარეს გიორგაძის მოთხოვნა და მასალა უცვლელი სახით დატოვეს.

„ჩვენ დღეს შესაგებელი შევიტანეთ, იქ გვაქვს დასაბუთება, რატომ არ ვიზიარებთ. მე დეტალებში შესვლას არ ვაპირებ, როცა დაინიშნება პროცესი, იქ ვისაუბრებთ. ერთადერთი მასალის სათაურია, ყველაზე მწვავე საკითხი, სადაც წერია, რომ „საზოგადოების მტერი ნომერი პირველი“ - ინგლისურენოვან საიტზეა ეს სათაური. ეს არის ჩვენი მოსაზრება და ვერ ვხედავ უკან წაღების აუცილებლობას,“ - ამბობს ტუღუში.

მოსარჩელე სარჩელის მოგებას საქართველოს სამოქალაქო კოდექსის მე-18 მუხლზე დაყრდნობით აპირებს. ამ მუხლით, პირს უფლება აქვს, სასამართლოს მეშვეობით, კანონით დადგენილი წესით დაიცვას საკუთარი პატივი, ღირსება, პირადი ცხოვრების საიდუმლოება, პირადი ხელშეუხებლობა ან საქმიანი რეპუტაცია შელახვისაგან. იმ შემთხვევაში, თუ პირის პატივის, ღირსების, საქმიანი რეპუტაციის ან პირადი ცხოვრების საიდუმლოების შემლახველი ცნობები გავრცელებულია მასობრივი ინფორმაციის საშუალებებით, მაშინ მათი უარყოფაც უნდა მოხდეს ამავე საშუალებებით.

საქართველოს კანონმდებლობაში არსებობს სხვა ნორმები, რომლებიც ასევე არეგულირებს პირის მიმართ მცდარი ფაქტის გავრცელებით მიყენებული ზიანის შემთხვევებს. სიტყვისა და გამოხატვის თავისუფლების შესახებ კანონის მიხედვით, საჯარო პირის მიმართ ცილისწამებისთვის პირს ეკისრება პასუხისმგებლობა თუ მოსარჩელე სასამართლოში დაამტკიცებს, რომ მოპასუხის განცხადება შეიცავს არსებითად მცდარ ფაქტს, მოსარჩელეს ზიანი მიადგა და ფაქტის მცდარობა მოპასუხისათვის წინასწარ იყო ცნობილი ან მოპასუხემ გამოიჩინა აშკარა და უხეში დაუდევრობა.