ევროპული საქართველოს ქუთაისის მაჟორიტარობის კანდიდატი, ოთარ კახიძე სოციალურ ქსელში ვიდეო და ფოტო მასალას ავრცელებს, სადაც ჩანს აგურების დაშენის შედეგად დაზიანებული მათი ოფისი. კახიძის თქმით, პოლიტიკური პარტიები ერთმანეთს იდეებით და პროგრამებით უნდა ეჯიბრებოდნენ და არა აგურებით, ქვებით და მუშტი-კრივით.

ფოტო: ოთარ კახიძე

"გუშინ ჩვენ ოფისს აგურები დაუშინეს. დააზიანეს ბანერი, მინების ჩამსხვრევა ვერ შეძლეს, რადგან ბრონირებული იყო. იმედი მაქვს, პოლიცია დროულად დაადგენს თავდამსხმელის ვინაობას. ეს ძალადობრივი გარემო უნდა შევცვალოთ 31 ოქტომბერს", — წერს ოთარ კახიძე ფეისბუქში.

შინაგან საქმეთა სამინისტროში On.ge-ს განუცხადეს, რომ მომხდარზე გამოძიება სისხლის სამართლის კოდექსის 187-ე მუხლით დაიწყო, რაც ნივთის დაზიანებას ან განადგურებას გულისხმობს.