ამერიკულ-ქართული განათლების ცენტრის ორგანიზებით და ესპანურ IE University-სა და რუმინულ Babeş-Bolyai University-სთან თანამშრომლობით 2020 წლის 10 ოქტომბერს, 12:00-დან 18:00 საათამდე გაიმართება განათლების საერთაშორისო ვირტუალური გამოფენა, რომელიც უმასპინძლებს 22 უნივერსიტეტს 13 ქვეყნიდან. ყველა დაინტერესებულ პირს გამოფენაზე შეეძლება მიიღოს ამომწურავი ინფორმაცია უნივერსიტეტისა და მისი პროგრამების შესახებ. მათ შეეძლებათ პირადად დაუკავშირდნენ უნივერსიტეტის წარმომადგენლებს და დაუსვან მათთვის საინტერესო კითხვები.

განათლების ვირტუალური გამოფენაში მონაწილეობის მისაღებად საჭიროა გაიაროთ რეგისტრაცია შემდეგ ბმულზე: leafonlinefair.com

მონაწილეთა შორის არის ვიტენბურგის გამოყენებითი მეცნიერებების უნივერსიტეტი. მას სამი კამპუსი გააჩნია — 2 ჰოლანდიაში: აპელდორნსა და ამსტერდამში, ხოლო ერთი ავსტრიაში — ვენაში.

ვიტენბურგში სწავლა შესაძლებელია ბაკალავრიატზე, მაგისტრატურასა და დოქტურანტურაზე. ამას გარდა, უნივერსიტეტს აქვს დაწყებითი კურსი: პროგრამა მათთვის, ვინც ჯერ არ არის მზად ბაკალავრიატზე ან მაგისტრატურაზე სწავლის დასაწყებად.

უნივერსიტეტი კონცენტრირებულია ბიზნესის, მეწარმეობისა და მენეჯმენტის სწავლებაზე და პროგრამები ბაკალავრიატზეც და მაგისტრატურაზეც თემატურად საკმაოდ მრავალფეროვანია: მაგალითად, ეკონომიკა და მენეჯმენტი, ტურიზმის მენეჯმენტი, ლოჯისტიკა, სპორტული ბიზნესის მართვა, უძრავი ქონების მართვა, განათლება და მეწარმეობა, ფინანსური სერვისების მართვა, ფინანსები და ინოვაცია. სამაგისტრო ხარისხთან ერთად, ბიზნეს ადმინისტრირების მაგისტრის ანუ MBA ხარისხის მიღებაც არის შესაძლებელი ვიტენბურგში.

აღსანიშნავია, რომ საბაკალავრო პროგრამა ისეა მოწყობილი, რომ აპლიკანტებს აქვთ შესაძლებლობა 6 დაწყების თარიღიდან აირჩიონ ერთერთი, ანუ უნივერსიტეტს აქვს 6 მიღების პერიოდი ბაკალავრიატზე.

ბაკალავრიატის სტუდენტებს აქვთ პროექტების კვირეულები, რომლის ფარგლებშიც მუშაობენ რეალურ ბიზნეს ქეისებზე. ბაკალავრებსაც და მაგისტრებსაც ეძლევათ შესაძლებლობა გაიარონ სტაჟირება სხვადასხვა კომპანიაში. ამაზე თავად უნივერსიტეტი ზრუნავს.

დაწვრილებითი ინფორმაციის მისაღებად საკმარისია ეწვიოთ განათლების საერთაშორისო ვირტუალურ გამოფენას 10 ოქტომბერს, 12 საათიდან 18 საათამდე. შემოგვიერთდით: leafonlinefair.com