მედია გამოცემა TUT.BY-ს ცნობით, რუსეთის ფედერაციის პრეზიდენტმა, ვლადიმერ პუტინმა ბელარუსის პრეზიდენტ ალექსანდრ ლუკაშენკოსთან სოჭში გამართული შეხვედრის შემდეგ განაცხადა, რომ მინსკს სესხის სახით 1,5 მილიარდ დოლარს გამოუყოფს.

"ეკონომიკა, უპირველეს ყოვლისა. ყოველთვის ვიცავთ ამ ხაზს. ჩვენ უფრო ახლოს უნდა ვიყოთ უფროს ძმასთან", — განაცხადა ლუკაშენკომ.

მან, ასევე, აღნიშნა, რომ ეკონომიკური თანამშრომლობის საკითხზე ის და პუტინი ჯერ კიდევ ბელარუსის საპრეზიდენტო არჩევნებამდე შეთანხმდნენ.

საკონსტიტუციო რეფორმის შესახებ ლუკაშენკოს წინადადებას პუტინმა ლოგიკური და დროული უწოდა. ლუკაშენკომ კორონავირუსთან ბრძოლის საქმეში თანამშრომლობისთვის რუსეთის პრეზიდენტს მადლობა გადაუხადა. ლუკაშენკომ, აგრეთვე, განაცხადა, რომ მას და პუტინს თავდაცვის საკითხებში არანაირი წინააღმდეგობა არ აქვთ.

პუტინისა და ლუკაშენკოს შეხვედრა დღეს 14 სექტემბერს სოჭში გაიმართა.

კრემლის პრესსპიკერი, დმიტრი პესკოვი აცხადებდა, რომ შეხვედრის შემდეგ რაიმე დოკუმენტის ხელმოწერა ან პრესკონფერენცია არ იგეგმება. შეხვედრას Russia Today ტრანსლირებდა.

ლუკაშენკოსთან შეხვედრამდე ოპოზიციონერმა სვეტლანა ტიხანოვსკაიამ ვლადიმერ პუტინს მიმართა. მისი თქმით, ის წუხს იმის გამო, რომ პუტინმა გადაწყვიტა, დიალოგი ეწარმოებინა უზურპატორთან და არა ხალხთან.

ბელარუსში ჩატარებული საპრეზიდენტო არჩევნების შემდეგ ქვეყანა საპროტესტო აქციებმა მოიცვა. მოქალაქეები ალექსანდრ ლუკაშენკოს კვლავ გაპრეზიდენტებას აპროტესტებენ და არჩევნების თავიდან ჩატარებას მოითხოვენ. არჩევნების შედეგებს არ აღიარებს გაერთიანებული ოპოზიციის კანდიდატი სვეტლანა ტიხანოვსკაია, რომელიც შედეგების გამოცხადების შემდეგ იძულებული იყო, ქვეყანა დაეტოვებინა. მისი ინიციატივით, ძალაუფლების მშვიდობიანი გადაბარებისთვის საკოორდინაციო საბჭო შეიქმნა.