უბედური შემთხვევა ინდურ გასართობ პარკ კიშკინტაში მაშინ მოხდა, როდესაც პარკის თანამშრომლები ერთ-ერთ ატრაქციონს ტესტავდნენ.

ატრაქციონი "დისკოს მოცეკვავე" გიგანტური დისკია, რომელიც 20-მდე ადამიანს იტევს. ვიდეოში ჩანს, როგორ მოძვრა დისკი ღერძს მოძრაობის პროცესში, გადმოვარდა 5 მეტრის სიმაღლიდან და ხალხი ქვეშ მოიყოლა.

შემთხვევას ერთი ადამიანის სიცოცხლე ემსხვერპლა. შვიდმა კი სხვადასხვა სიმძიმის დაზიანებები მიიღეს.

"დისკოს მოცეკვავე" პარკის ერთ-ერთი პოპულარული ატრაქციონი იყო, რომელიც რამდენიმე კვირით ადრე ძლიერმა წვიმებმა დააზიანა. უბედური შემთხვევისას მასზე მყოფი ადამიანები პარკის თანამშრომლები იყვნენ, რომლებსაც შეკეთებული დისკის გამოსაცდელ გაშვებაში მონაწილეობის მიღება სთხოვეს.

მათგან რამდენიმემ განაცხადა, რომ არ სურდათ ატრაქციონზე დაჯდომა, მაგრამ აიძულეს. ადგილობრივმა პოლიციამ პარკის მფლობელი და მენეჯერი სამსახურეობრივი გულგრილობის ბრალდებით დააკავეს.