რუსეთში მომავალი წლიდან იწყება რეალითი შოუ, რომელშიც ნებადართული გახდება ისეთი დანაშაულების ჩადენა, როგორიცაა მკვლელობა და გაუპატიურება. ამის შესახებ ინფორმაციას The Independent Siberian Times-ზე დაყრდნობით წერს.

ზამთარში, სატელევიზიო შოუ Game2-ში, 30 კაცი და ქალი კონკურსანტი შეეცდება გადარჩეს ციმბირის ტყეში, სადაც გარეული ცხოველებიც იქნებიან, მათ შორის დათვი და მგელი. შოუ 9 თვის განმავლობაში გაგრძელდება და პრიზი 1,6 მილიონი ამერიკული დოლარი იქნება. ორგანიზატორების ინფორმაციით, მონაწილეობის მისაღებად აუცილებელია კონკურსანტი დაეთანხმოს შოუში მონაწილეობის წესებს.

შოუს 2 ათასი კამერა 900 ჰექტარზე დააკვირდება. “ბრძოლა, ალკოჰოლი, მკვლელობა, გაუპატიურება, მოწევა, ყველაფერი ნებადართულია”- ნათქვამია შოუს სარეკლამო რგოლში.

თუმცა, სავარაუდოდ, მონაწილეები ასევე დაექვემდებარებიან რუსეთის კანონმდებლობას და პოლიცია დააკავებს მათ, ვინც ჩაიდენს დანაშაულს შოუს მიმდინარეობისას.

კონკურსანტებისთვის ნებადართული იქნება დანები, თუმცა არა ცეცხლსასროლი იარაღი. გარდა ამისა, მათ მიეცემათ რუსეთის გრუს სპეცნაზის რეკომენდაციები, რათა გადარჩნენ. მონაწილეებს მოუწევთ ისეთ გარემოში ყოფნა, სადაც ზაფხულის ტემპერატურა 35 გრადუსს აღემატება, ზამთარში კი მინუს 40 გრადუსამდე ეცემა. მთელ ტერიტორიაზე იქნება განთავსებული კამერები, მაგრამ თითოეულ მონაწილესაც ექნება პორტატული კამერა, რომელიც 7 საათი დატენვის გარეშე ძლებს.