ქობულეთის მერია, გურამ ფალავანდიშვილის მიერ, ქობულეთში სქესობრივ განათლებაზე დაზიანებულ გრაფიტთან დაკავშირებით ამბობს, რომ "ფაქტის შესწავლა მოხდება ენერგო-პრო ჯორჯიასთან ერთად".

"მიმდინარე წელს ორგანიზაცია GrlzWave-ის მიერ, შემოვიდა წერილი, სადაც ორგანიზაციის წევრები განმარტავდნენ, რომ ახორციელებდნენ პროექტს შეიმეცნე. აღნიშნული პროექტის ფარგლებში ისინი ენერგო-პრო ჯორჯიას ქვესადგურების მოხატვას გეგმავდნენ. ორგანიზაციამ წარმოადგინა ესკიზები და ნებართვა ენერგო-პრო ჯორჯიასგან. აღვნიშნავთ, რომ ფაქტის შესწავლა მოხდება ენერგო-პრო ჯორჯიასთან ერთად. ასევე, გვსურს აღვნიშნოთ, რომ ვგმობთ მსგავსს საქციელს (გრაფიტის დაზიანების ფაქტს). ჩვენს ქვეყანაში სიტყვის გამოხატვის თავისუფლება არის მნიშვნელოვანი ფაქტორი დემოკრატიული საზოგადოების ჩამოყალიბებაში", — განაცხადა ქობულეთის მერიამ.

22 აგვისტოს, ჰომოფობიური და ძალადობრივი ჯგუფების ლიდერმა, გურამ ფალავანდიშვილმა ქობულეთში სქესობრივ განათლებაზე გრაფიტი დააზიანა. ვიდეოში ფალავანდიშვილი ამბობს, რომ მერი, რომელმაც ამის დაწერა დაუშვა "საცემია" და ის უნდა გადადგეს.

ქალთა ფონდისა და GrlzWave-ის საერთო პროექტის, შეიმეცნეს ფარგლებში სექსუალურ განათლების შესახებ ცნობიერების ასამაღლებლად მსგავსი გრაფიტი საქართველოს რამდენიმე ქალაქში დაიხატა. როგორც GrlzWave-ის თანადამფუძნებელი ათინა ბრეგვაძე On.ge-სთან საუბარში განმარტავს, მათ გააკეთეს გრაფიტები ქალთა სქესობრივ-რეპროდუქციულ ჯანმრთელობაზე და ამისთვის ოფიციალური ნებართვაც აქვთ აღებული.