შესაძლოა, Euphoria-ს ახალი ეპიზოდი იმაზე ადრე ვიხილოთ, ვიდრე შესაძლებელია და იმაზე გვიან, ვიდრე ამის იმედი გვქონდა.

HBO-ს ამ გახმაურებული შოუს მთავარი როლის შემსრულებელმა, ახალგაზრდა ამერიკელმა მსახიობმა ზენდეიამ Jimmy Kimmel Live-ის გადაცემაში სერიალის მომავალ გეგმებზე ისაუბრა და აღნიშნა, რომ შესაძლოა, მეორე სეზონის პრემიერამდე "შუალედური", ერთი დამოუკიდებელი ეპიზოდი გამოუშვან.

"ყველანი ვმუშაობთ იმ საკითხზე, რომ როგორმე მეორე სეზონის გადაღება შევძლოთ, რომლითაც გვინდა მაყურებელს მხოლოდ საუკეთესო სანახაობა შევთავაზოთ, მაგრამ ასევე გვინდა, რომ ყველაფერი უსაფრთხოების დაცვით მოხდეს. ამის გამო, შესაძლოა, ერთი, სეზონებს შორის "შუალედური" ეპიზოდი გადავიღოთ. არ ვიცი, ამას ზუსტად რა ვუწოდო, მაგრამ შეგვიძლია შეზღუდული სამსახიობო გუნდით უსაფრთხო გარემოში ერთი ეპიზოდი მაინც გადავიღოთ, რომელიც მაყურებელს მეორე სეზონის გამოსვლამდე რაღაცას მაინც მისცემს", — განაცხადა მსახიობმა.

ეიფორიის პრემიერა გასულ წელს შედგა და მან მაშინვე მრავალი ერთგული მაყურებელი შეიძინა. ამის გამო HBO-მ მალევე დააანონსა, რომ სერიალი მეორე სეზონით განახლდებოდა, რომლის ნახვასაც ყველა ამ ზაფხულს ელოდებოდა, თუმცა პანდემიამ სხვა მრავალი პროექტის მსგავსად ამ შოუს გადაღებებიც შეაფერხა.

"გადაღებების დაწყებისთვის უკვე მზად ვიყავით, როცა ეს ყველაფერი მოხდა. თანაც სულ რაღაც ორი დღით ადრე, სანამ გადაღებების პირველი დღე გვექნებოდა", — ამბობს ზეინდეია, რომელიც ამ სერიალში შესრულებული როლით ემის წლევანდელ დაჯილდოებაზეა ნომინირებული.

როგორც მსახიობი აცხადებს, შოუს შემქმნელებმა ჯერ ზუსტად ისიც კი არ იციან, თუ როდის განახლდება გადაღებები, რის გამოც პრემიერის ზუსტ თარიღზე საუბარი მეტისმეტად ნაადრევია.

თუმცა ის ვერსია, რომ მცირე ჯგუფით ერთ ეპიზოდს მაინც გადაიღებენ, რათა ლოდინი მცირედით მაინც მოვიკლათ, დამაიმედებლად ჟღერს. თანაც ეს გამოცდილება ზენდეიასთვის ახალი არ იქნება: ივლისში ცნობილი გახდა, რომ ეიფორიის რეჟისორმა და სცენარისტმა, სემ ლევინსონმა ზენდეია ჯონ დევიდ-ვაშინგტონთან ერთად კარანტინში საიდუმლო ფილმში გადაიღო.