პრემიერმინისტრ გიორგი გახარიას განცხადებით, სახელმწიფო არასტანდარტულ ვაშლს 10 თეთრით დაასუბსიდიდებს. მისი თქმით, "არც ერთი გრამი პროდუქტი, ჩვენი ფერმერების წარმოებული, დაუბინავებელი არ უნდა დარჩეს".

როგორც გახარიამ მთავრობის სხდომის დაწყებამდე განაცხადა, წელს საერთაშორისო ბაზრებზე ვაშლის ფასი საკმაოდ დაეცა, ამიტომ მთავრობამ მიიღო სუბსიდირების გადაწყვეტილება. მისივე განმარტებით, საბოლოოდ, ფერმერებისთვის ვაშლის ფასი იქნება არანაკლებ 22 თეთრი.

"სოფლის მეურნეობის სამინისტროს რეკომენდაციით, ჩვენ დღეს უნდა მივიღოთ გადაწყვეტილება არასტანდარტული ვაშლის სუბსიდირების შესახებ, 10 თეთრით. საბოლოოდ, ეს ფასი იქნება ჩვენი მეწარმეებისთვის, ფერმერებისთვის, დაახლოებით 22 თეთრი, არანაკლებ 22 თეთრისა. ყველა ის კომპანია, რომელიც ჩაერთვება შემსყიდველ შტაბში, რომელიც შეიქმნება ვაშლის დაბინავების მიზნით, ამ სუბსიდირებას მიიღებს დამატებითი 10 თეთრის რაოდენობით და ეს ძალზედ მნიშვნელოვანია რეგიონისთვის", — თქვა გახარიამ.

მისივე ინფორმაციით, პროგრამა 2020 წლის დეკემბრამდე გაგრძელდება.