ჯანდაცვის მინისტრის, ეკატერინე ტიკარაძის განცხადებით, მესტია კარანტინის რეჟიმში 28 დღის განმავლობაში დარჩება.

"რაც შეეხება საკარანტინო პერიოდს, ისევე როგორც ყველა სხვა მუნიციპალიტეტში, სადაც მსგავს აფეთქებას ჰქონდა ადგილი, მნიშვნელოვანია, რომ გავლილი იყოს 2 საკარანტინე პერიოდი, რაც ნიშნავს 28 დღეს", — განაცხადა ჯანდაცვის მინისტრმა სააკორდინაციო საბჭოს სხდომის შემდეგ გამართულ ბრიფინგზე.

მისივე თქმით, შემცირდება თუ არა ეს პერიოდი, დამოკიდებულია ეპიდემიოლოგების დასკვნებზე.

კორონავირუსის ახალი დადასტურებული შემთხვევების გამო, მესტიაში შესვლა და გამოსვლა იზღუდება. ამას პოლიცია გააკონტროლებს.

ამასთან, დაბა მესტიაში, უშგულსა და ლენჯერში ფუნქციონირების უფლება ექნებათ მხოლოდ აფთიაქებს, საბანკო დაწესებულებებს, სასურსათო მაღაზიებსა და ღია ტიპის საკვებ დაწესებულებებს.

როგორც მთავრობის ადმინისტრაციაში აცხადებენ, თავშეყრის ადგილებზე მკაცრად გაკონტროლდება დისტანციის დაცვა, დახურულ სივრცეებში პირბადეების გამოყენება და ხელის ჰიგიენა.