ავღანეთის დიდმა ასამბლეამ თალიბანის დაჯგუფების 400 წევრის პატიმრობიდან გათავისუფლების გადაწყვეტილება მიიღო. მათ შორის არიან ის პირებიც, ვინც სასჯელს სამოქალაქო პირებსა და უცხოელებზე თავდასხმისთვის იხდიან.

"დაბრკოლებების აღმოფხვრის, სამშვიდობო პროცესის დაწყების და სისხლისღვრის დასრულების მიზნით, ლოია ჯირგამ [უხუცესთა ასამბლეა] 400 თალიბის გათავისუფლების გადაწყვეტილება დაადასტურა", — ნათქვამია კრების მიერ მიღებულ რეზოლუციაში.

მოგვიანებით პრეზიდენტმა აშრაფ ღანიმაც დაადასტურა, რომ პატიმრების გათავისუფლების გადაწყვეტილებას ხელს მოაწერდა.

2020 წლის თებერვალში, ამერიკის შეერთებულმა შტატებმა და თალიბანმა ხელი მოაწერეს შეთანხმებას, რომლითაც ავღანეთის 19-წლიანი კონფლიქტი უნდა დასრულდეს. აშშ-სთან მიღწეული სამშვიდობო შეთანხმება ციხეებიდან 5 000 თალიბი პატიმრის გათავისუფლებასაც ითვალისწინებს.

ამერიკისა და ნატო-ს სამხედრო ძალებმა ავღანეთში ალ-ყაიდას და თალიბანის წინააღმდეგ შეტევა 2001 წლის 7 ოქტომბერს, 11 სექტემბრის ტერაქტის შემდეგ დაიწყეს. კონფლიქტის განმავლობაში 2 400-ზე მეტი ამერიკელი ჯარისკაცი დაიღუპა, 12 ათასი ჯერ კიდევ განთავსებულია ბაზებზე. კონფლიქტის დასრულება პრეზიდენტ დონალდ ტრამპის ერთ-ერთი დაპირება იყო.

ტრამპის განცხადებით, ნოემბრის საპრეზიდენტო არჩევნებამდე, მას სურს, რომ ავღანეთში განთავსებული ამერიკელი ჯარისკაცების კონტინგენტი 5000-მდე შემცირდეს.