თბილისის საქალაქო სასამართლოს გადაწყვეტილებით, გიორგი ლობჟანიძეს, ანუ ცენტრალური საავადმყოფოს დირექტორს, მოსამართლემ 100 000-ლარიანი გირაო შეუფარდა, ხოჭოლავას და ყიფიანს კი — წინასწარი პატიმრობა.

გამომდინარე იქიდან, რომ ხოჭოლავა საქართველოში არ იმყოფება, მას წინასწარი პატიმრობა დაუსწრებლად შეეფარდა.

პროკურატურა სამივე ბრალდებულზე პატიმრობის გამოყენებას ითხოვდა, რადგან, მათი თქმით, არსებობს მოწმეებზე ზემოქმედების და მტკიცებულებების განადგურების საფრთხე. ბრლადების მხარე დირექტორის გირაოს, სავარაუდოდ, გაასაჩივრეს. რაც შეეხება ხოჭოლავას, მასზე საერთაშორისო ძებნა გამოცხადდება.

"ერთადერთი მოთხოვნაა, რომ სამართლიანობა დამკვიდრდეს", — აცხადებს კომაში მყოფი ნათია ცირეკიძის ოჯახის ადვოკატი.

ბრალდებული ექიმების ადვოკატის, სალომე ჯანუაშვილის განცხადებით კი, "დანაშაული არ არსებობს ამ ადამიანების შემთხვევაში არც ერთი მუხლით და არც ერთი კვალიფიკაციით". დაცვის მხარე ბრალდებულების აღკვეთის ღონისძიების გარეშე დატოვებას ითხოვდა.

"მიღებული გადაწყვეტილება კანონით დადგენილ ფარგლებში გასაჩივრდება ვახტანგ ყიფიანის მიმართ. ლობჟანიძის შემთხვევაში კი, სასამართლომ ნაწილობრივ გაიზიარა მათი არგუმენტები. სადაც არ დაკმაყოფილდა, ის გასაჩივრდება", — აცხადებს სალომე ჯანუაშვილი.

4 აგვისტოს პროკურატურამ გაავრცელა ინფორმაცია თბილისის ცენტრალური საავადმყოფოს დირექტორისა და ექიმების დაკავების შესახებ. უწყების ცნობით, კლინიკის ექიმმა პაციენტი დაარწმუნა, რომ ქირურგიულ ოპერაციას იტალიიდან მოწვეული ექიმები ჩაუტარებდნენ, თუმცა ოპერაცია, შესაბამისი ლიცენზიის გარეშე, თავად გაუკეთა, რის შემდეგაც პაციენტი ამ დრომდე კომაშია. ექიმები და კლინიკა ბრალს უარყოფენ.