პარლამენტმა პირველი მოსმენით მხარი დაუჭირა საკონსტიტუციო ცვლილებებს, რომელიც 2020 წლის საარჩევნო სისტემის ცვლილებას ეხებოდა. ოქტომბერში საპარლამენტო არჩევნები 120/30 სისტემით ჩატარდება.

საკონსტიტუციო ცვლილებებს 149 დეპუტატიდან 136-მა დაუჭირა მხარი, 5 წინააღმდეგი იყო. ამასთან, ნაციონალური მოძრაობის ფრაქციის წევრები კენჭისყრას არ დაესწრნენ. მათი თქმით, 8 მარტის შეთანხმება სრულად არ შესრულებულა, რადგან გიორგი რურუა კვლავ პატიმრობაში იმყოფება.

რომელმა დეპუტატებმა არ დაუჭირეს მხარი საკონსტიტუციო ცვლილებებს:

წინააღმდეგი

  • ბიძინა გეგიძე;
  • ალექსანდრე ერქვანია;
  • ემზარ კვიციანი;
  • კახაბერ ოქრიაშვილი;
  • დავით ჭიჭინაძე;

თავი შეიკავა

  • ნატო ჩხეიძე.

არ ესწრებოდნენ

  • ბადრი ბასიშვილი;
  • თინა ბოკუჩავა;
  • რომან გოცირიძე;
  • კობა ნაყოფია;
  • სალომე სამადაშვილი;
  • აზერ სულეიმანოვი;
  • მამუკა ჩიქოვანი.

საკონსტიტუციო ცვლილება ძალაში რომ საბოლოოდ შევიდეს, მეორე და მესამე მოსმენაზეც 113-მა დეპუტატმა უნდა დაუჭუროს მხარი.

ცვლილებების თანახმად, არსებული საარჩევნო სისტემა უნდა შეიცვალოს და მომავალი მოწვევის პარლამენტში პარტიული სიით 77-ის ნაცვლად 120 დეპუტატს აირჩევენ, მაჟორიტარი კი 73-ის ნაცვლად მხოლოდ 30 იქნება.

აღნიშნულ შეთანხმებას ოპოზიციამ და ხელისუფლებამ დიპლომატების შუამავლობით ხანგრძლივი მოლაპარაკებების შემდეგ 8 მარტს მიაღწიეს.

ცვლილება შეეხება საარჩევნო ბარიერსაც. ეს იმას ნიშნავს, რომ თუკი აქამდე პარტიას პარლამენტში მოსახვედრად მოსახლეობის 5%-ის მხარდაჭერა სჭირდებოდა, ახალი სისტემით 1%-იანი ბარიერის გადალახვაც საკმარისი იქნება.

კიდევ ერთი საკითხი, რაზეც ოპოზიცია და ხელისუფლება შეთანხმდნენ, ე.წ. 40%-იანი ჩამკეტის შემოღებაა, რაც იმას გულისხმობს, რომ პოლიტიკური ძალა, რომელსაც 40%-ზე ნაკლები მხარდაჭერა ექნება, პარლამენტში კი მოხვდება, მაგრამ მთავრობის დაკომპლექტებას ვერ შეძლებს.

რაც შეეხება ოლქებს, ცნობილია, რომ თბილისში 8 სამაჟორიტარო ოლქი იქნება. დასავლეთ საქართველოში იქნება 12, ხოლო აღმოსავლეთ საქართველოში — 10.

საარჩევნო სისტემაზე მოლაპარაკებები მას შემდეგ დაიწყო, რაც ბიძინა ივანიშვილმა 2019 წლის ივნისში პირობა გასცა, რომ ქვეყანა სრულად პროპორციულ სისტემაზე გადავიდოდა, თუმცა ნოემბერში აღნიშნული ცვლილელები პარლამენტში თავად ქართულმა ოცნებამ ჩააგდო.