ნაციონალური მოძრაობის წევრი ელენე ხოშტარია საზოგადოებრივი თავშეყრის ადგილებში თამბაქოს მოწევაზე რეგულაციების დაწესების წინააღმდეგია და მიიჩნევს, რომ აღნიშნული წესი ბიზნესს დააზიანებს:

"ნებისმიერი ფორმის ჩარევა კერძო ბიზნესში ან ადამიანის ცხოვრებაში, რომ მიუთითოს სად მოწიოს და სად არ მოწიოს არის არასწორი, ეკონომიკისთვის შემზღუდავი და დამაზიანებელი. თავად კაფეებს კლიენტების სურვილიდან გამომდინარე შეუძლიათ ზოგი იყოს მოსაწევი ადგილი და ზოგი არ იყოს მოსაწევი. მითუმეტეს დღევანდელ ეკონომიკურ ვითარებაში, როდესაც მთავარი აქცენტი უნდა იყოს მცირე და საშუალო ბიზნესის წახალისებაზე, ნებისმიერი შეზღუდვა არის საზიანო. მე თვითონ ვარ მწეველი და მიყვარს კაფეში მოწევა".

დღესვე, ქართული ოცნების წევრი და ჯანდაცვის კომიტეტის თავმჯდომარე აკაკი ზოიძე პარლამენტის შენობაში მოწევის აკრძალვის ინიციატივით გამოვიდა. ზოიძემ თამბაქოს მავნე ზეგავლენაზე ისაუბრა და განაცხადა, რომ პარლამენტმა მაგალითი უნდა მისცეს სხვა სტრუქტურებსაც.

საზოგადოევრივი თავშეყრის ადგილებში მოწევის აკრძალვას დაეთანხმა ნაციონალური მოძრაობის წევრი სერგი კაპანაძე, თუმცა იგი განმარტავს რომ დეტალები და ფორმა მნიშვნელოვანია და მხოლოდ აკრძალვა საკმარისი არ იქნება.

გიორგი კვირიკაშვილმა, 29 ნოემბრის მთავრობის სხდომაზე განაცხადა, რომ 2017 წლიდან, თამბაქოს ნაწარმზე აქციზის ფასი გაიზრდება და ამას გარდა, იგეგმება საზოგადოებრივი თავშეყრის ადგილებში თამბაქოს მოხმარების კონტროლის გააქტიურებას.