თბილისის მერი, კახა კალაძე ვარკეთილში მდებარე ანას ბაღის დამცველებს "უსაქმური ადამიანების ჯგუფს" უწოდებს. დღეს, 23 მაისს ჟურნალისტებთან საუბრისას მერი ამტკიცებდა იმასაც, რომ ანას ბაღს არაფერი ემუქრება და რომ მისივე მერობის პერიოდში, "ბევრი სკვერი და პარკი გადაარჩინეს".

"სრული პასუხისმგებლობით ვამბობ, მშნებელობა, რომელიც მიმდინარეობს, ანას ბაღთან კავშირში არაა. პირიქით, ანას ბაღი კიდევ უფრო გაფართოვდება", — ამბობს კალაძე.

ანას ბაღის მიმდებარედ კორპუსს მაინც აშენებენ. ამის გასაპროტესტებლად დღეს, 23 მაისს 17 საათზე თბილისის მერიასთან ანას ბაღის დამცველების აქცია იგეგმება.

27 აპრილს მშენებლობის შეჩერების შესახებ განჩინება სააპელაციომ საქალაქოს უკან დაუბრუნა შენიშვნით, რომ "თანაზომიერების პრინციპი", ანუ ყველა მხარის პოზიცია (მათ შორის კომპანიის) იყოს დაცული. ამასთან, სასამართლოს განცხადებით, საზოგადოებაში არასწორი ინფორმაცია გავრცელდა, რომ მშენებლობის გაგრძელების ნებართვა მათ არ გაუციათ, არამედ, განჩინება მხოლოდ უკან დააბრუნეს.

ანას ბაღის დასაცავად მოსახლეობა აქციას რამდენიმე თვეა მართავს. მათ უნდათ, რომ 10- სართულიანი კორპუსი არ აშენდეს, რადგან ეს პარკის არსებობას საფრთხის წინაშე აყენებს.

თბილისის მერი ანას ბაღის საკითხს თებერვალშივე გამოეხმაურა. კახა კალაძის თქმით, ანა ბაღს არანაირი პრობლემა არ ექმნება. ის აღნიშნავს, ბაღთან მიმართებაში მერიას თავისი დამოკიდებულება აქვს და ერთადერთი, რაც იგეგმება, ბაღის სრულ რეაბილიტაციაა.

კალაძემ ამის შესახებ მაშ შემდეგ ირწმუნებოდა, რაც ანას ბაღის გადასარჩენად ადგილობრივმა მოსახლეობამ და აქტივისტებმა ტერიტორიაზე ასფალტი აყარეს და მცენარეები დარგეს, მშენებელმა კომპანიამ კი პარტიზანულად მოწყობილი დასასვენებელი სივრცე მოშალა.