თავდაცვის მინისტრის მოვალეობის შემსრულებელი ლევან იზორია მოსკოვსა და სოხუმს შორის გაფორმებულ სამხედრო შეთანხმებას გამოეხმაურა. დღეს, 24 ნოემბერს, საკომიტეტო მოსმენების შემდეგ, მინისტრმა ჟურნალისტებთან საუბრისას განაცხადა, რომ თავდაცვისუნარიანობის ამაღლება საქართველოსთცვის საუკეთესო პრევენცია იქნება:

"ძალიან კრიტიკულია ჩვენი პოზიცია, ჩვენ ვთქვით ამის შესახებ არაერთგზის. ჩვენი ამოცანაა ქვეყნის განვითარება, ხოლო თავდაცვის სისტემის ფარგლებში ჩვენი თავდაცვისუნარიანობის ამაღლება, რაც არის საუკეთესო პრევენცია ყოველგვარი საფრთხის აცილებისთვის".

22 ნოემბერს, რუსეთის ფედერაციის პრეზიდენტმა ხელი მოაწერა კანონს სოხუმის საოკუპაციო რეჟიმთან, კერძოდ გალის რაიონში, შეიარაღებული ძალების გაერთიანებული დაჯგუფების შექმნასთან დაკავშირებით დადებული ე.წ. შეთანხმების რატიფიკაციის თაობაზე.

გაერთიანებული სამხედრო დაჯგუფებები რუსეთსა ან აფხაზეთზე შეიარაღებული თავდასხმის საფრთხეზე რეაგირებისთვის შეიქმნა. რუსეთის მხრიდან დაჯგუფებაში აფხაზეთის ტერიტორიაზე მდებარე სამხედრო ბაზა შედის, აფხაზეთის მხრიდან კი საარტილერიო და საავიაციო ჯგუფები, სპეციალური დანიშნულების რაზმი და 2 მოტორიზებული ქვეითთა ბატალიონი.