ეროვნული ბანკი 25 მარტს აუქციონზე 40 მილიონი აშშ დოლარის გაყიდვას აპირებს. როგორც ეროვნული ბანკი აცხადებს, აუქციონი სავალუტო ბაზრის მხარდაჭერისკენაა მიმართული.

"სავალუტო ბაზრის უცხოური ვალუტით მიწოდების მხარდასაჭერად ეროვნულმა ბანკმა უკვე განახორციელა ორი ინტერვენცია საერთო ჯამში 60 მლნ აშშ დოლარის ოდენობით. ამავე დროს, როგორც ცნობილია, წინა წლებში ხორციელდებოდა რეზერვების დაგროვება", — ნათქვამია განცხადებაში.

ეროვნული ბანკის მტკიცებით, საქართველოს ფინანსური სისტემა ეკონომიკურ გამოწვევებს მომზადებული შეხვდა:

"საბანკო სექტორი ჯანსაღი და მდგრადია, რაც იმის გარანტია, რომ შოკის პიკის გადავლის შემდგომ საქართველოს ეკონომიკა სწრაფად აღდგენას და ნორმალურ რეჟიმში დაბრუნებას შეძლებს".

სებ-მა 40 მილიონი დოლარი აუქციონზე 19 მარტსაც გაყიდა. ამის შემდეგ ლარი დოლართან მიმართებით 2,4 თეთრით გამყარდა, თუმცა მეორე დღეს ისევ გაუფასურება დაიწყო.