ავსტრალიელი მკვლევარების თქმით, წყლის ნაკადის დამანგრეველი ზემოქმედებისა და ოკეანის დონის ზრდის შედეგად, წყნარი ოკეანის 5 პატარა კუნძული გაქრა. ინფორმაციას BBC ავრცელებს.

გამქრალი კუნძულები სოლომონის არქიპელაგის ნაწილს შეადგენდნენ, არცერთი მათგანი ადამიანებით დასახლებული არ ყოფილა.

თუმცა, არქიპელაგის 6 დასახლებულ კუნძულზე, რომელთა სანაპიროებიც ნელ-ნელა იძირება, სოფლები ინგრევა.

მკვლევარების თქმით, ესაა პირველი მეცნიერული დადასტურება იმის, რომ კლიმატური ცვლილებები წყნარი ოკეანის სანაპირო ხაზზე გავლენას მოახდენს.

კვლევა გარემოს დაცვის ლიტერატურაში გამოქვეყნდა. მასში ჩანს, რომ მეცნიერები 1947 წლიდან 2014 წლამდე 33 კუნძულს აკვირდებოდნენ და იყენებდნენ როგორც ისტორიულ მონაცემებსა და ადგილობრივების ცნობებს, ასევე სატელიტური და საჰაერო ფოტოებს.

აღმოჩნდა, რომ სოლომონის არქიპელაგზე წყლის დონე ბოლო ათწლეულების განმავლობაში ყოველწლიურად 10 მილიმეტრით იმატებდა.