ქართული ოცნების აღმასრულებელი მდივნის ირაკლი კობახიძის განცხადებით, ნაციონალურ მოძრაობას განზრახული აქვს მარნეულის 50-ე უბნის ხელოვნურად ჩაშლა. ამის შესახებ მან დღეს, 30 ოქტომბერს ბრიფინგზე ისაუბრა.

კობახიძემ ასევე იმ ინფორმაციაზეც გაამახვილა ყურადღება, რაც გუშინ საღამოს, 29 ოქტომბერს გავრცელდა, საქმე ეხება იმას, რომ საჯარო მოხელეებს სავარაუდოდ ევალებათ ოთხკუთხედი, სპეციფიური ფორმით ხმის მიცემა:

"ინფორმაცია, რომ ხელისუფლების თუ ქართული ოცნების დავალებით საჯარო მოხელეებს ევალებათ ოთხკუთხედი ფორმით, თუ რაღაც სპეციფიური ფორმით ბიულეტენების შემოხაზვა არის დეზინფორმაცია, ასეთი რამ ჩვენი მხრიდან არ მომხდარა".

საქართველოს იურისტთა ასოციაციის ინფორმაციით, თბილისსა და რეგიონებში საბავშვო ბაღის აღმზრდელებს, სკოლების პედაგოგებსა და საჯარო მოხელეებს მოუწოდებენ, რომ კენჭისყრის უბანში მისვლისას და მათ მიერ არჩევანის გაკეთებისას ბიულეტენში არჩევანი განსხვავებული ფორმით დააფიქსირონ:

"მათ აქვთ მითითება, რომ საარჩევნო სუბიექტის ნომერი შემოხაზონ ოთხკუთხედი ფორმით და პარალელურად განახორციელონ მათ მიერ დაფიქსირებული არჩევანის ფოტო გადაღება".

საიას განცხადებით, თუ აღნიშნული ფაქტი შეესაბამება რეალობას, საქმე ეხება საარჩევნო კანონმდებლობის დარღვევა.