პარტია კანონი და სამართლის ერთ-ერთი ლიდერი, თაკო ჩარკვიანი პლატფორმა — ერთად ერთის წინააღმდეგ მიერ შემუშავებულ ე.წ. შავ სიას ხალხის დაცინვად მიიჩნევს. მისი თქმით, ოპოზიციის გაერთიანება "ძალით შეთითხნილია" და საერთო ღირებულებები არ აქვთ.

"ოპოზიციის მხრიდან ეს არ არის ნორმალური და ძალიან მიხარია, რომ არ ვარ ამ ყველაფრის მონაწილე. მაგრამ არაფერი გამკვირვებია. იმიტომ, რომ ძალიან ბევრი მსტოვარი ზის იმ მაგიდასთან. ამ ტიპის გაერთიანება, სადაც საერთო ღირებულებები არ არის, არ ამართლებს. არ ხდება ასე, რომ შენ რუსეთთან მიმართებაში სხვა ღირებულებები გაქვს, ხოლო სამოქალაქო საზოგადოებასთან სხვა მიმართულება გაქვს. რაღაცებში გამიჯვნა მოგვიწევს და ალბათ, ამ საკითხს დავაყენებთ ძალა ერთობაშია", — განუცხადა თაკო ჩარკვიანმა რუსთავი 2-ს.

ოპოზიციამ ე.წ. შავი სიის პირველი ხუთეული დაასახელა. სიაში შედიან მოსამართლეები ვალერიან ფილიშვილი და გიორგი არევაძე. ფილიშვილი ოქტომბერში აქციების დაშლის დროს დაკავებულების საქმეს განიხილავდა. გიორგი არევაძე კი თიბისი ბანკისა და ნიკა გვარამიას საქმეებს განიხილავს.

გარდა ამისა, სიაშია შესული პროკურორი ვაჟა თოდუა, რომელიც 20 ივნისის საქმის პროკურორია. ოპოზიციამ ე.წ. შავ სიაში შეიყვანა თბილისის საპატრულო პოლიციის უფროსი კახა ბუხრაძე და თბილისის მერიის უსაფრთხოების საქალაქო სამსახურის უფროსი ნუგზარ ჭონქაძე, რომელსაც ფეისბუქზე სულიკო კედელაშვილის სახელით ყალბი ანგარიში აქვს.