ესტონეთის პრეზიდენტმა, კერსტი კალიულაიდმა რუსეთის საელჩოს უკან დაუბრუნა საჩუქრად მიღებული ყირიმული შამპანურის ბოთლი. ამის შესახებ ინფორმაცია ადგილობრივმა გამოცემამ გაავრცელა, On.ge-ს კი ესტონეთის პრეზიდენტის ადმინისტრაციაში დაუდასტურეს.

როგორც გამოცემა წერს, დაბადების დღეზე პრეზიდენტმა საელჩოსგან რამდენიმე საჩუქარი, მათ შორის ყირიმული შამპანიური მიიღო. ეს უკანასკნელი კი ადმინისტრაციამ მალევე უკან დააბრუნა, რადგან ესტონეთი ყირიმს უკრაინის ტერიტორიად აღიარებს, რომელიც რუსეთს აქვს ანექსირებული.

ესტონეთის პრეზიდენტი უკრაინისა და საქართველოს მხარდამჭერი განცხადებებით გამოირჩევა. ის ამბობდა, რომ 2008 წლის აგვისტოს ომის შემდეგ ევროპა რუსეთთან ჩვეულ ურთიერთობას დაუბრუნდა, რაც შეცდომა იყო. ის ოკუპაციისა და ანექსიის საკითხზე რუსეთის პრეზიდენტ ვლადიმერ პუტინსაც კი ესაუბრა.

შენიშვნა: აღნიშნული ინფორმაცია თავდაპირველად ადგილობრივ გამოცემაზე დაყრდნობით გამოქვეყნდა, მოგვიანებით კი დროებით წაიშალა უზუსტობის თავიდან აცილების მიზნით, ვინაიდან პირველწყაროსთან გადამოწმება ვერ ხერხდებოდა. მას შემდეგ, რაც ადმინისტრაციამ On.ge-ს ფაქტი დაუდასტურა, მასალა განახლდა.