მთავარი არხის დამფუძნებელი, ნიკა გვარამია საკუთარი სასამართლო პროცესიდან გააძევეს. თბილისის საქალაქო სასამართლოში დღეს, 3 იანვარს გვარამიას საქმის არსებითი განხილვა დაიწყო.

სასამართლო დარბაზიდან გამოსვლის შემდეგ გვარამიამ მისი გაძევების მიზეზებზე ისაუბრა. როგორ ის აღნიშნავს, მოსამართლე, გიორგი არევაძე იანვარში ბევრ პროცესს ნიშნავს, რაც მისთვის და მისი ადვოკატებისთვის მიუღებელია:

"მე ვუთხარი, რომ შეუძლია ყოველდღე ნიშნოს სხდომები, არის დღეები, როცა ვერ მივალ და შეუძლია ხელიხელჩაკიდებულმა იაროს პროკურორთან ერთად. ბოლოს ხელიხელჩაკიდებულები სადამდე მივლენ ის და პროკურორი, მაგას განახებთ".

გვარამია ამბობს, რომ მან ითხოვა, ორშაბათობით სხდომები არ ჩანიშნულიყო, რადგან კვირას გვიანობამდე ეთერი აქვს, თუმცა მოსამართლემ ეს არ გაითვალისწინა.

"ყველა სხდომა ორშაბათს ჩანიშნა. დაახლოებით, ათი სხდომის ჩანიშვნას აპირებს იანვარში. ეს კაცი ამ პროცესის ორ-სამ თვეში მორჩენას აპირებს, გასაგებია რითი. მე საერთოდ არ ვიცოდი ვინ იყო მოსამართლე. ეს არის მოსამართლე, რომელიც იხილავს თიბისის საქმეს. და ჩემი სახელით და მამუკა ხაზარაძის და დანარჩენი ადამიანების, ვის ციხეში ჩასმასაც აპირებს, რომ ციხეში მოხვდება ის, გიორგი არევაძე და ხელიხელჩაკიდებული ჩაჯდება კამერაში იმ პროკურორთან ერთად, რომელიც აქ ზის და თიბისის საქმეზე უზის საპროკურორო სკამზე", — განაცხადა ნიკა გვარამიამ.

რუსთავი 2-ის კანონიერი ინტერესის საწინააღმდეგოდ უფლებამოსილების ბოროტად გამოყენების, მისი კუთვნილი დიდი ოდენობით თანხების სამსახურებრივი მდგომარეობის გამოყენებით მითვისების და ქონების მოჩვენებითი ან/და თვალთმაქცური გარიგებით გადამალვის საქმეზე პროკურატურამ გამოძიება მიმდინარე წლის 20 ივლისს დაიწყო.

ტელეკომპანიის ყოფილ დირექტორს, ნიკა გვარამიას წინასწარი შეთანხმებით ჯგუფის მიერ სამსახურებრივი მდგომარეობის გამოყენებით, დიდი ოდენობით ქონების გაფლანგვის, კომერციული მოსყიდვის, ყალბი ოფიციალური დოკუმენტის დამზადება-გამოყენების ბრალი წაუყენეს. მას, ასევე, ბრალად ედება ფულის გათეთრება.

11 აგვისტოს რუსთავი 2-ის ყოფილ დირექტორს სასამართლომ აღკვეთის ღონისძიებად 40 ათასი ლარის ოდენობით გირაო შეუფარდა და პროკურატურის ნებართვის გარეშე ქვეყნის დატოვება აუკრძალა.