თბილისის საქალაქო სასამართლოში რუსთავი 2-ის ყოფილი გენერალური დირექტორის, ნიკა გვარამიას საქმე განიხილეს, თუმცა უშედეგოდ. ის 23 დეკემბერს გადაიდო. მომდევნო პროცესზე გახდება ცნობილი, თუ რა მტკიცებულებებს დაუშვებს მოსამართლე. ნიკა გვარამია აცხადებს, რომ მათ დააყენეს დაზარალებულთა ღია პროცესზე გამოკითხვის აუცილებლობის შუამდგომლობა:

"ჩვენ გვაინტერესებს იმ ადამიანების დაკითხვა, ვინც თავს მიიჩნევს დაზარალებულად, ეს არის ნინო ნიჟარაძე, ქიბარ ხალვაში და იმ ადამიანის, ვისი აბსოლუტურად არაპროფესიონალური, მის კომპეტენციაში არშემავალი, არა ადმინისტრაციული აქტის, არამედ, რაღაც მოსაზრების საფუძველზე ვარ მიცემული პასუხისგებაში. ეს არის კახა ბექაური".

პროკურორ ზვიად გუბელაძის თქმით, დაცვის მხარეს არ ჰქონდა დოკუმენტაცია, თუ რის საფუძველზე სურთ გამოკითხვების ჩატარება დაცვის მხარეს. მისივე განცხადებით, დაზარალებულად ცნობილია სამაუწყებლო კომპანია რუსთავი 2 და აღნიშნული დადგენილება მათ გააცნეს რუსთავი 2-ის წარმომადგენელს.

რუსთავი 2-ის კანონიერი ინტერესის საწინააღმდეგოდ უფლებამოსილების ბოროტად გამოყენების, მისი კუთვნილი დიდი ოდენობით თანხების სამსახურებრივი მდგომარეობის გამოყენებით მითვისების და ქონების მოჩვენებითი ან/და თვალთმაქცური გარიგებით გადამალვის საქმეზე პროკურატურამ გამოძიება მიმდინარე წლის 20 ივლისს დაიწყო.

ტელეკომპანიის ყოფილ დირექტორს, ნიკა გვარამიას წინასწარი შეთანხმებით ჯგუფის მიერ სამსახურებრივი მდგომარეობის გამოყენებით, დიდი ოდენობით ქონების გაფლანგვის, კომერციული მოსყიდვის, ყალბი ოფიციალური დოკუმენტის დამზადება-გამოყენების ბრალი წაუყენეს. მას, ასევე, ბრალად ედება ფულის გათეთრება.

11 აგვისტოს რუსთავი 2-ის ყოფილ დირექტორს სასამართლომ აღკვეთის ღონისძიებად 40 ათასი ლარის ოდენობით გირაო შეუფარდა და პროკურატურის ნებართვის გარეშე ქვეყნის დატოვება აუკრძალა.