ავსტრიაში ადოლფ ჰიტლერის სახლს, სადაც ის დაიბადა, პოლიციის განყოფილებად გადააკეთებენ. ქვეყნის შინაგან საქმეთა მინისტრმა, ვოლფგან პესჩორმა განაცხადა, რომ ეს იქნება სიგნალი იმისა, რომ სახლი ნაციზმს აღარავის მოაგონებს.

ჰიტლერი ავსტრიის ქალაქ ინის ბრაუნაუში, მეჩვიდმეტე საუკუნის შენობის ბინაში დაიბადა. მან იქ პირველი რამდენიმე კვირა გაატარა.

სახლის სამომავლო ბედთან დაკავშირებით დისკუსიები დიდი ხანია გრძელდება. წლების განმავლობაში ხელისუფლება ბინას ყოფილი მფლობელისგან ქირაობდა, რათა ულტრამემარჯვენეების ტურიზმი აეცილებინა თავიდან.

რაღაც პერიოდის განმავლობაში შენობაში შშმ პირებისთვის განკუთვნილი ყოველდღიური ცენტრი იყო განთავსებული. თუმცა ყოფილმა მეპატრონემ, გერლინდ პომერმა უარი თქვა შენობის ადაპტაციაზე, შემდგომში კი უარს აცხადებდა, როგორც ხელისუფლებისთვის ნაგებობის მიყიდვაზე, ისე მის გარემონტებაზე. საბოლოოდ სახლი 2017 წელს გამოისყიდეს.

ჰიტლერი ინის ბრაუნაუში 1889 წელს დაიბადა. მან ავსტრია ოჯახთან ერთად სამი წლის ასაკში დატოვა. ის ვენაში დროებით ქვეყნის ანექსირების შემდეგ 1938 წელს დაბრუნდა.

ჰიტლერის მმართველობის დროს ნაცისტურმა გერმანიამ 1939-1945 წლებში მეორე მსოფლიო ომი დაიწყო. გენოციდის პოლიტიკის გამო ექვს მილიონზე მეტი ებრაელი დაიღუპა.