საერთაშორისო გამჭვირვალობა — საქართველოს ინფორმაციით, საჯარო უწყებების საზოგადოებასთან/მედიასთან ურთიერთობის დეპარტამენტში დასაქმებული ადამიანების რაოდენობა 2018 წელს წინა წელთან შედარებით გაზრდილია. გასულ წელს მათთვის გადახდილი თანხა 20 მილიონ ლარზე მეტი იყო. ეს მაშინ, როცა ხელისუფლების წარმომადგენლები მუდმივად ჩივიან იმაზე, რომ გაკეთებული საქმე საზოგადოებამდე ვერ მიაქვთ.

"2013 წლიდან დღემდე ყოველწლიურად იზრდება საზოგადოებასთან ურთიერთობის სამსახურებში დასაქმებული ადამიანების რაოდენობა და მათი ანაზღაურებისთვის დახარჯული თანხა", — აღნიშნავენ საერთაშორისო გამჭვირვალობა — საქართველოში.

კვლევის მიგნებები:

  • 2017 წელს 194 უწყების პიარსამსახურში დასაქმებული იყო 996 თანამშრომელი, ხოლო 2018 წელს — 1 037;
  • 2017 წელს 194 უწყების პიართანამშრომელთა ანაზღაურებამ 18 111 258 ლარი იყო, 2018 წელს კი 20 047 896 ლარი.

ყველაზე მეტი, 73 თანამშრომელი, მედიასთან/საზოგადოებასთან ურთიერთობის სამსახურში საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროშია დასაქმებული, მას თავდაცვის სამინისტრო მოსდევს.

ფოტო: საერთაშორისო გამჭვირვალობა — საქართველო

კვლევაში აღნიშნულია, რომ პიარის თანამშრომელთა ანაზღაურებაში ყველაზე მეტ თანხას საქართველოს თავდაცვის სამინისტრო ხარჯავს, რომელსაც საქართველოს პარლამენტი და შინაგან საქმეთა სამინისტრო მოყვება.

ფოტო: საერთაშორისო გამჭვირვალობა — საქართველო

"2018 წელს საერთაშორისო გამჭვირვალობა — საქართველოს მიერ გამოქვეყნებულ ანგარიშში, რომელიც 2017 წლის ოქტომბრის ჩათვლით მოიცავდა მონაცემებს, საქართველოს მთავრობის ადმინისტრაცია ლიდერობდა საზოგადოებასთან/მედიასთან ურთიერთობის სამსახურში დასაქმებული თანამშრომლებისა და მათთვის გადახდილი ანაზღაურების მხრივ. მაშინ აღნიშნული ინფორმაცია სასამართლოს გზით მოვიპოვეთ. სამწუხაროდ, მიმდინარე კვლევა მთავრობის ადმინისტრაციის მონაცემებს არ მოიცავს, ვინაიდან არაერთი მცდელობის მიუხედავად, მათგან სრული ინფორმაციის მიღება ვერ შევძელით", — განმარტავენ ორგანიზაციაში.