აშშ-ში, ტეხასის ქალაქ ელ პასოში სროლის შედეგად 20 ადამიანი დაიღუპა და 26 დაშავდა. BBC-ის ცნობით, შტატის გუბერნატორი გრეგ აბოტი მდგომარეობას აღწერს, როგორც "ტეხასის ისტორიაში ერთ-ერთი ყველაზე მომაკვდინებელი დღე".

შემთხვევა ჰიპერმარკეტ Walmart-ში მოხდა, აშშ-მექსიკის საზღვრიდან რამდენიმე კილომეტრის მოშორებით.

საქმეზე უკვე დაკავებულია 21 წლის კაცი, რომელიც პოლიციის ცნობით, დალასის მკვიდრია. ამერიკული მედიის ცნობით, მას პატრიკ კრუსიუსი ჰქვია.

შემთხვევას გამოეხმაურა შტატების პრეზიდენტი დონალდ ტრამპი. მან ტვიტერის გვერდზე დაწერა, რომ ტეხასში მომხდარი არა მხოლოდ ტრაგედიაა, არამედ "ეს არის სიმხდალის გამოვლინება".

"მე ვდგავარ ყველას გვერდით, ვინც ამ სიძულვილით სავსე დანაშაულს გმობს. არ არსებობს რაიმე, რაც უდანაშაულო ადამიანებს სიკვდილს გაამართლებს", — წერს ტრამპი.

ტეხასში მომხდარ ტრაგედიას გამოეხმაურა საქართველოს პრემიერ-მინისტრი მამუკა ბახტაძე:

"თანავუგრძნობ მსხვერპლთა მგლოვიარე ოჯახებსა და მეგობრებს. ქართველი ხალხი სოლიდარულია ამერიკელებისადმიგლოვის ამ მძიმე წუთებში", — ნათქვამია მამუკა ბახტაძის სამძიმარში.

BBC წერს, რომ ჯერჯერობით უცნობია დაღუპულთა ვინაობა, თუმცა Reuters-ის ინფორმაციით, მათ შორის სამი მექსიკელია.

ერთი კვირის წინ კალიფორნიაში საკვების ფესტივალზე შეიარაღებულმა თინეიჯერმა სამი ადამიანი მოკლა. ტეხასში მომხდარი მე-8 ყველაზე მომაკვდინებელი შემთხვევაა აშშ-ს თანამედროვე ისტორიაში.