იუსტიციის ყოფილი მინისტრი, ზურაბ ადეიშვილი ამბობს, რომ ხელისუფლებაში ყოფნის პერიოდში, მისი ყველაზე დიდი მიღწევა იუსტიციის სახლებია. ამის შესახებ მან ნიკა გვარამიასთან ინტერვიუში ისაუბრა. ადეიშვილმა გვარამიას კითხვის პასუხად თავის შეცდომებზეც ისაუბრა და ორი შეცდომა დაასახელა:

"არ ჩავდეთ საკმარისი ფული განათლებაში, რომ შეგვეცვალა პოლიტიკური ელიტა და მეორე, ალბათ, ის, რომ [ჩემი მხრიდან] ნაკლები ტოლერანტობა უნდა ყოფილიყო ხელისუფლების დარღვევების მიმართ".

ზურაბ ადეიშვილს ე.წ. ცხრაწლიანი რეჟიმის ერთ-ერთ მთავარ პირად განიხილავენ. წინა ხელისუფლების დროს ის სხვადასხვა დროს იყო გენერალური პროკურორი და იუსტიციის მინისტრი. 2017 წელს ზურაბ ადეიშვილი ვანო მერაბიშვილთან ერთად აკურას ღვინის ქარხნის ჩამორთმევის საქმეზე დამნაშავედ სცნეს და 2 წლით თავისუფლების აღკვეთა მიესაჯა. ამნისტიის შესახებ საქართველოს კანონის გამოყენებით საბოლოოდ განესაზღვრა 1 წლით და 6 თვის ვადით თავისუფლების აღკვეთა.