ენმ-ს ერთ-ერთი ლიდერი, რომან გოცირიძე მისივე პარტიის წევრის, გივი თარგამაძის მანქანის აფეთქებასთან დაკავშირებით გავრცელებულ მოსაზრებას, რომ შესაძლოა მომხდარი დადგმული ყოფილიტო, უკანასკნელი დონის ნაძირლობას უწოდებს:

"მოგვწონს თუ არა შევარდნაძე, არსებობდნენ ძალიან უტვინო ადამიანები, რომლებიც ამბობდნენ, რომ შევარდნაძემ ორჯერ აიფეთქა საკუთარი თავი. ასეთი უტიფრები და უნამუსო ხალხი გამოჩნდა დღეს, რომლებიც ამბობენ, რომ შეიძლება რაღაც ინსცენირება იყოს და ასე შემდეგ. ეს არის უკანასკნელი დონის ნაძირლობა, როდესაც ადამიანი სიკვდილს გადაურჩა, რაღაც საოცრებით. ასეთი აზრები მოახვიო თავს საზოგადოებას იმის გამო, რომ წინასაარჩევნოდ რაღაც შედეგები მიიღო. ვისი ჩაფიქრებულიც არ უნდა ყოფილიყო, პასუხისმგებელი არის დღევანდელი ხელისუფლება, რომელმაც შექმნა სიძულვილის ატმოსფერო და რომელმაც შექმნა დაუსჯელობის ატმოსფერო".

4 ოქტომბერს, თბილისში, კოლმეურნეობის მოედნის მიმდებარე ტერიტორიაზე ნაციონალური მოძრაობის წევრის, გივი თარგამაძის მანქანა აფეთქდა. დაზიანდა მიმდებარე შენობები, ასევე ახლომდებარე ავტომობილები, დაშავდნენ გამვლელები. ჯანდაცვის მინისტრის ინფორმაციით, მანქანის აფეთქებისას დაშავებულთა რიცხვი ხუთია. მათგან ერთ-ერთს საავადმყოფოში ოპერაცია ჩაუტარდა.

შსს-მ გამოძიება დამამძიმებელ გარემოებაში, განზრახ მკვლელობის მცდელობის მუხლით დაიწყო.

გივი თარგამაძე დარწმუნებულია, რომ მისი ავტომობილი მართვადი ასაფეთქებლით ააფეთქეს და პასუხისმგებლობას ხელისუფლებას აკისრებს.