გაერთიანებული ოპოზიციის წევრის, ზაალ უდუმაშვილის განცხადებით, შს მინისტრ გიორგი გახარიას თანამდებობიდან გადადგომა "დღეების ამბავია". ამის შესახებ მან პარლამენტთან, პლენარული სხდომის პარალელურად გამართულ აქციაზე განაცხადა.

"ჩვენი პროტესტი გრძელება. დღესაც, ხვალაც, ზეგაც, არ დავიღლებით. პარლამენტის შენობასთანაც ვიდგებით, თუ საჭირო იქნება, მთავრობის ადმინისტრაციასთანაც და ყველა უწყებასთან. ქართულ ოცნებას ამოსუნთქვის საშუალებას არ მივცემთ. გახარია უნდა გადადგეს, ეს არის მთავარი პირობა, რომელიც აუცილებლად უნდა შესრულდეს და აუცილებლად შესრულდება, დარწმუნებული ვარ... ყველას ვპირდები, ყველას მოუწევს პასუხისმგებლობის აღება გავრილოვის ღამეზე. ყველას, ვინც გადაფარებულია გახარიას", — თქვა უდუმაშვილმა.

მან აქციის მონაწილეებს დაშლისკენ მოუწოდა და მიმართა, რომ დღეს, შვიდ საათზე პარლამენტის წინ აქციას შეუერთდნენ.