საქართველოში რუსეთის დელეგაციის ყოფნის დრო არ შემცირდება. ამის შესახებ მართლმადიდებლობის საპარლამენტთაშორისი ასამბლეის პრეზიდენტმა და რუსმა დეპუტატმა, სერგეი გავრილოვმა რუსულ პროსაცელისუფლებო გამოცემა Ria-ს განუცხადა.

"ჩვენ მზად ვართ ვიმუშაოთ და ჩვენ მხარს გვიჭერებ დელეგაციები იორდანიიდან, ყაზახეთიდან, აზერბაიჯანიდან, სომხეთიდან... ჯერჯერობით ყველაფერი გეგმის მიხედვით იქნება, არაფრის შემცირებას არ ვაპირებთ, სანამ დღის წესრიგს არ განვიხილავთ", — აღნიშნა გავრილოვმა.

პარლამენტში ასამბლეის შეწყვეტის შემდეგ სერგეი გავრილოვმა განაცხადა, რომ ეს არის უმსხვილესი საერთაშორისო ფორუმის ჩაშლის უვარგისი მცდელობა.

დღეს, 20 ივნისს მართლმადიდებლობის საპარლამენტთაშორისო ასამბლეის ფარგლებში რუსი დეპუტატები საქართველოს პარლამენტში მივიდნენ. ასამბლეის წევრი, სერგეი გავრილოვი პარლამენტში, ირაკლი კობახიძის სავარძელში ჩაჯდა და სხდომა წაიყვანა. სწორედ ამ ფაქტმა გამოიწვია ოპოზიციონერი დეპუტატებისა და მოქალაქეების პროტესტი. გუშინ 19 ივნისს პრეზიდენტის ყოფილ სასახლეში სერგეი გავრილოვმა განაცხადა, რომ "2008 წლის ომი ისტორიაა, რომლისგანაც გაკვეთილები უნდა ვისწავლოთ". მანვე აღნიშნა, რომ ეს იყო უსიამოვნება, რომლის "ინიციატორები ახლა საქართველოში არ იმყოფებიან". ამის შესახებ მან რუსთავი 2-თან ისაუბრა.

გავრილოვმა აღნიშნა ისიც, რომ საქართველოსა და რუსეთს შორის ბევრი უსიამოვნება იყო, მაგრამ პრობლემების მოგვარება შესაძლებელია. ასამბლეაზე მან ისაუბრა იმაზე, რომ მსოფლიოს ძალიან ბევრი პრობლემა აქვს და ამ სიტუაციაში ძალის პოზიციიდან საუბარი და სანქციების დაწესება არასწორია. მისი თქმით, მსოფლიო მართლმადიდებლობის ირგვლივ უნდა გაერთიანდეს.

19-22 ივნისს თბილისი მართლმადიდებლობის საპარლამენტთაშორისო ასამბლეას (IAO) მასპინძლობს. 26-ე გენერალური ასამბლეის სესიის თემაა "პარლამენტარიზმის წვლილი თანამედროვე სოციალური და პოლიტიკური მოვლენების გააზრებაში".