თბილისში ტაქსით მოძრაობის ნებართვა 30 300-ზე მეტ მძღოლს აქვს მიღებული. თბილისის მერიის მიერ გასაჯაროებული მონაცემები 2019 წლის 14 ივნისის მდგომარეობას ასახავს.

თბილისის მერის, კახა კალაძის თქმით, 2019 წლის პირველი ოქტომბრიდან თეთრი ფერის ტაქსები იმოძრავებენ, გამონაკლისი იქნება "გამოძახების ტაქსები". ამის შესახებ თბილისის მერმა, კახა კალაძემ დედაქალაქის მთავრობის 26 სექტემბრის სხდომაზე განაცხადა. პირველი ოქტომბრიდან ამ საქმიანობის შესაბამისი ლიცენზიის გარეშე განხორციელების გამო პირი 200 ლარით დაჯარიმდება.

გარდა ამისა, ტაქსების რეფორმის მიხედვით, ლიცენზიის ორი მიმართულება იქნება A და B კატეგორია. A კატეგორიის ლიცენზიის მქონე მძღოლებს აქვთ ვალდებულება, ჰყავდეთ თეთრი ავტომობილი. ამასთან, A კატეგორიის ლიცენზიის მქონე ტაქსის მძღოლებს მუნიციპალიტეტისგან უფასოდ გადაეცემათ სპეციალური მანათობელი. რაც შეეხება B კატეგორიის ლიცენზიანტებს, მათ არ აქვთ არანაირი ვალდებულება, არც ტაქსის გადაღებვისა და არც მანათობლის დაყენების. მათ შეეძლებათ "გამოძახების" ტაქსებად იმუშაონ.